এসপ্তাহৰ ভিতৰত দ্বিতীয়বাৰৰ বাবে ছলমান খানক হত্যাৰ ভাবুকি! ২ কোটি টকাৰ দাবীৰে আৰক্ষীলৈ বাৰ্তা

বলীউডৰ তাৰকা ছলমান খানক পুনৰ হত্যাৰ ভাবুকি। এই বাৰ্তা মুম্বাই যান-বাহন আৰক্ষীৰ ওচৰ পালেহি। দাবী কৰা হৈছে যে ছলমানে যদি দুই কোটি টকা নিদিয়ে তেন্তে তেওঁক হত্যা কৰা হ’ব! এই ঘটনাই চাঞ্চল্য বিয়পাইছে। মুম্বাই আৰক্ষীয়ে এনে ভাবুকি কোনে প্ৰেৰণ কৰিছিল তাক লৈ তদন্ত আৰম্ভ কৰিছে৷

আৰক্ষীৰ সূত্ৰ অনুসৰি ছলমানক হত্যা কৰাৰ ভাবুকি দি যান-বাহন আৰক্ষীলৈ বাৰ্তা প্ৰেৰণ কৰা হয়। কিন্তু ক’ৰ পৰা বাৰ্তা প্ৰেৰণ কৰা হৈছে তাৰ কোনো উল্লেখ নাই। মুম্বাইৰ ৱৰ্লিত এজন অচিনাক্ত ব্যক্তিৰ বিৰুদ্ধে গোচৰ ৰুজু হৈছে।

দুদিনমান পূৰ্বে মৃত্যুৰ ভাবুকি লাভ কৰিছিল ছলমানে। কেৱল ছলমানেই নহয়, নিহত এন চি পি নেতা (অজিত পাৱাৰ) বাবা ছিদ্দিকীৰ পুত্ৰ জীশানকো ভাবুকি দিয়া হৈছিল। মঙলবাৰে জানিব পৰা গৈছিল যে শেহতীয়াকৈ জীশানে মৃত্যুৰ ভাবুকি লাভ কৰিছিল। তেওঁ মুম্বাইৰ বান্দ্ৰা ইষ্ট সমষ্টিৰ বিধায়ক। শুকুৰবাৰে সন্ধিয়া তেওঁৰ বান্দ্ৰা কাৰ্যালয়লৈ অচিনাকি নম্বৰৰ পৰা ফোন আহিছিল। অভিযোগ অনুসৰি জীশানক ফোনযোগে হত্যাৰ ভাবুকি দিয়া হৈছিল। ছলমানকো একেদৰেই ভাবুকি প্ৰেৰণ কৰা হৈছিল। মঙলবাৰে নয়দাৰ পৰা মুম্বাই আৰক্ষীয়ে গ্ৰেপ্তাৰ কৰে অভিযুক্ত যুৱকজনক।

প্ৰসংগক্ৰমে যোৱা ১২ অক্টোবৰত জীশানৰ কাৰ্যালয়ৰ সন্মুখত আক্ৰমণকাৰীয়ে গুলীয়াই হত্যা কৰিছিল বাবা ছিদ্দিকীক। তিনিজন আক্ৰমণকাৰীয়ে তেওঁৰ ওপৰত গুলীচালনা কৰে। ইয়াৰ পিছত আৰক্ষীয়ে এজন এজনকৈ ১৫ জন লোকক গ্ৰেপ্তাৰ কৰে। সেই ঘটনাৰ কিছু সময়ৰ পিছতে ছলমানক মৃত্যুৰ ভাবুকি দিয়া হৈছিল।

মন কৰিবলগীয়া যে ছলমান ছিদ্দিকীৰ ঘনিষ্ঠ বুলি জনা যায়। এন চি পি নেতাগৰাকীৰ হত্যাকাণ্ডৰ এসপ্তাহৰ পাছত ছলমানক হত্যা কৰাৰ ভাবুকি দি মুম্বাই আৰক্ষীলৈ বাৰ্তা প্ৰেৰণ কৰা হৈছিল৷