আৰক্ষীৰ স্ক্যানাৰত লৰেন্স বিষ্ণোইৰ ভাতৃ আনমোল; আমেৰিকাৰ পৰা প্ৰত্যাৰ্পণৰ প্ৰক্ৰিয়া আৰম্ভ

এইবাৰ দিল্লীৰ স্ক্যানাৰত লৰেন্স বিষ্ণোইৰ ভাতৃ আনমোল। আমেৰিকাৰ পৰা তেওঁক প্ৰত্যাৰ্পণ কৰাৰ প্ৰক্ৰিয়া আৰম্ভ কৰিছে মুম্বাই আৰক্ষীৰ ক্ৰাইম ব্ৰাঞ্চে।

ছলমান খানৰ বাসগৃহৰ বাহিৰত গুলীচালনাৰ পৰা আৰম্ভ কৰি মহাৰাষ্ট্ৰৰ প্ৰাক্তন মন্ত্ৰী বাবা ছিদ্দিকীৰ হত্যাকাণ্ডলৈকে আনমোল বিষ্ণোইৰ নাম চৰ্চালৈ আহিছে।

আনমোল কুখ্যাত গেংষ্টাৰ লৰেন্স বিষ্ণোইৰ ভাতৃ। তেওঁ আমেৰিকাত থাকে। এইবাৰ মুম্বাই আৰক্ষীৰ অপৰাধ শাখাই তেওঁক ভাৰতলৈ ঘূৰাই অনাৰ প্ৰক্ৰিয়া আৰম্ভ কৰিলে।

মহাৰাষ্ট্ৰ কন্ট্ৰ’ল অৱ অৰ্গেনাইজড ক্ৰাইম এক্টৰ অধীনত এখন বিশেষ আদালতে আনমোল বিষ্ণোইৰ নামত জামিনবিহীন পৰোৱানা জাৰি কৰা বুলি জানিব পৰা গৈছে। আৰক্ষীয়ে কিছুমান বিশেষ নথি-পত্ৰৰ বাবে অপেক্ষা কৰি আছে। সংকেত পালেই তেওঁলোকে প্ৰত্যৰ্পণৰ পৰৱৰ্তী পদক্ষেপ আৰম্ভ কৰিব।

লগতে পঢ়কঃ বিজেপি নেতাৰ পুত্ৰৰ BMW গাড়ীৰ খুন্দাত নিহত ব্যক্তি, পলাতক পিতৃ-পুত্ৰ; ক্ষোভ যোগীৰাজ্যত

সূত্ৰ অনুসৰি আমেৰিকাত আনমোলৰ সন্ধানত ইতিমধ্যে ৰেড কৰ্ণাৰ জাননী জাৰি কৰা হৈছে।

জানিব পৰা মতে, আমেৰিকা প্ৰশাসনে সেই দেশত আনমোলৰ উপস্থিতিৰ ইংগিত দিয়াৰ পিছতে প্ৰত্যাৰ্পণ প্ৰক্ৰিয়া আৰম্ভ হৈছে। আগতে আনমোল কানাডাত থকা বুলি ভবা হৈছিল।

যোৱা মাহত নেশ্যনেল ইনভেষ্টিগেশ্যন এজেঞ্চিয়ে আনমোল বিষ্ণোইক মষ্ট ৱাণ্টেড হিচাপে তালিকাভুক্ত কৰিছিল। লগতে তেওঁৰ সন্ধান দিব পাৰিলে ১০ লাখ টকা দিব বুলিও ঘোষণা কৰা হৈছে।

শেহতীয়াকৈ মহাৰাষ্ট্ৰৰ প্ৰাক্তন মন্ত্ৰী বাবা ছিদ্দিকীৰ হত্যাকাণ্ডৰ সৈতে জড়িত বিষ্ণুোই চক্ৰৰ নাম। এই গেঙৰ মূল মুৰব্বী লৰেন্স বিষ্ণোই হ’লেও এই গেঙৰ আগশাৰীৰ আন ২ জনো আছে। তাৰে এজন হৈছে আনমোল বিষ্ণোই। সম্পৰ্কত লৰেন্স বিষ্ণোইৰ সৰু ভাতৃ। এই পৰ্যন্ত বিভিন্ন গোচৰত তেওঁৰ নাম থাকিলেও এন আই এৰ অধিসূচনাৰ পিছত আনমোল শিৰোনামলৈ আহিছে।

অপৰাধমূলক কাৰ্যকলাপ, সংগঠিত অপৰাধৰ লগত জড়িত লোকক গ্ৰেপ্তাৰ কৰিবলৈ চেষ্টা চলাইছে NIAই। ইয়াৰ অংশ হিচাপে এনআইএই আনমোল বিষ্ণোইক গ্ৰেপ্তাৰৰ বাবে আৰ্থিক পুৰস্কাৰ ঘোষণা কৰিছে। এই বছৰত মুম্বাইত ছলমান খানৰ ঘৰত গুলীচালনাৰ ঘটনাত আনমোল বিষ্ণোইৰ নাম চৰ্চালৈ আহে।

লগতে পঢ়কঃ যশস্বী অভিনেতা, পৰিচালক কুলদা কুমাৰ ভট্টাচাৰ্যৰ দেহাৱসান

সূত্ৰ অনুসৰি, ছলমান খানৰ ঘৰত গুলীচালনা কৰা গোচৰৰ অভিযোগনামাত এই অপৰাধৰ সবিশেষ পোহৰলৈ আহিছে। অভিযোগ অনুসৰি গুলীচালনা কৰা ২ শ্বুটাৰৰ সৈতে পোনপটীয়াকৈ কথা পাতিছিল আনমোল বিষ্ণোইয়ে। আনমোলে দেশৰ বাহিৰত বহি থাকিয়েই পৰিকল্পনা ৰচি সেই অনুসৰি কাম কৰি আছে।