সত্ৰনগৰী বৰপেটাক গৰ্বিত কৰিলে বৰপেটাৰ ছেইণ্ট টেৰেজা ইংলিছ স্কুলৰ দুগৰাকী ছাত্ৰীয়ে

আজি ঘোষণা কৰা হাইস্কুল শিক্ষান্ত পৰীক্ষাত সত্ৰনগৰী বৰপেটালৈ গৌৰৱ কঢ়িয়াই আনিলে দুগৰাকীকৈ ছাত্ৰীয়ে ৷ বৰপেটা আজাদ নগৰৰ চুলতানা আয়েচা চিদ্দিকা আৰু মেটুৱাকুছিৰ শ্যামলিনা পাঠক নামৰ ছাত্ৰী দুগৰাকীয়ে ছেইণ্ট টেৰেজা ইংলিছ মিডিয়াম স্কুলৰ পৰা ক্ৰমে তৃতীয় আৰু নৱম স্থান অধিকাৰ কৰি বৰপেটাবাসীক আজিৰ দিনটোত গৰ্বিত হোৱাৰ সুযোগ দিলে ৷

 এই সাফল্যক লৈ বিদ্যালয়খনত এক উছৱমুখৰ পৰিৱেশে বিৰাজ কৰিছে ৷ ছাত্ৰ-ছাত্ৰীসকলে আনন্দ উল্লাস প্ৰকাশ কৰাৰ লগতে এই গৌৰৱময় ক্ষণত বিদ্যালয়খনত উপস্থিত হৈ কৃতী ছাত্ৰী দুগৰাকীক অভিনন্দন জনায় বৰপেটা সমষ্টিৰ বিধায়ক গুণীন্দ্ৰ নাথ দাস, উপায়ুক্ত থানেশ্বৰ মালাকাৰ, আৰু আৰক্ষী অধীক্ষক ভায়’লেট বৰুৱাই ৷

 আয়েচাই সৰ্বমুঠ ৫৯১ নম্বৰ লাভ কৰিছে ৷ তেওঁ ইংৰাজী, গণিত, সাধাৰণ বিজ্ঞান আৰু উচ্চ গণিতত ১০০ ৰ ভিতৰত ১০০কৈ নম্বৰ লাভ কৰাৰ বিপৰীতে সমাজ বিজ্ঞানত ৯৮, অসমীয়াত ৯৩ নম্বৰ লাভ কৰিছে ৷ আয়েচাৰ দেউতাকৰ নাম আৰমান আলী আৰু মাতৃ আচমে মমতাজ ৱাহিদ ৷ দেউতাক পেচাত এজন অভিযন্তা। আয়েচাই নৰ্থ ইষ্ট নাওৰ আগত জনাইছে যে তেওঁৰ জীৱনৰ লক্ষ্য হ’ল এগৰাকী সফল চিকিৎসক হোৱাৰ৷

ইপিনে নৱম স্থান লাভ কৰা একেখন বিদ্যালয়ৰে ছাত্ৰী শ্যামলিনা পাঠকে অসমীয়াত ৯৩, ইংৰাজীত ৯৯, গণিতত ৯৭, সাধাৰণ বিজ্ঞানত ১০০, সমাজ বিজ্ঞানত ৯৮, আৰু উচ্চ গণিতত ৯৮ নম্বৰ সহ সৰ্বমুঠ ৫৮৫ নম্বৰ লাভ কৰিছে ৷

শ্যামলিনাৰ পিতৃ ড0 ধৰ্মেশ্বৰ পাঠক আৰু মাতৃ হিৰণ্ময়ী পাঠক বৰপেটা ছোৱালী মহাবিদ্যালয়ত অধ্যাপনাৰ সতে জড়িত হৈ আহিছে ৷ শ্যামলিনা এগৰাকী সুগায়িকাও। তেওঁ ভৱিষ্যতে এগৰাকী অভিযন্তা হোৱাৰ সপোন পুহি ৰাখিছে ৷