পাকিস্তানৰ সৈতে উত্তেজনাৰ মাজতে প্ৰতিৰক্ষা বিষয়াৰ সৈতে বৈঠক প্ৰধানমন্ত্ৰী মোদীৰ

প্ৰায় তিনিটা দশকৰ ভিতৰত আটাইতকৈ ভয়াৱহ ৰূপত পাকিস্তানৰ সৈতে উত্তেজনা বৃদ্ধি পাইছে। এনে পৰিস্থিতিৰ মাজতে প্ৰধানমন্ত্ৰী নৰেন্দ্ৰ মোদীয়ে নতুন দিল্লীত থকা নিজৰ বাসগৃহত প্ৰতিৰক্ষা বিভাগৰ শীৰ্ষ বিষয়াসকলৰ সৈতে উচ্চ পৰ্যায়ৰ বৈঠক আহ্বান কৰে, প্ৰতিৰক্ষা মন্ত্ৰী ৰাজনাথ সিং, ৰাষ্ট্ৰীয় নিৰাপত্তা উপদেষ্টা অজিত ডোভাল, প্ৰতিৰক্ষা মুৰব্বী জেনেৰেল অনিল চৌহান আৰু সেনা, নৌসেনা আৰু বায়ুসেনাৰ মুৰব্বীসকলে অংশগ্ৰহণ কৰে।

বৈঠকৰ পূৰ্বে বৈদেশিক সচিব বিক্ৰম মিশ্ৰী, কৰ্ণেল ছফিয়া কুৰেশী আৰু উইং কমাণ্ডাৰ ব্যোমিকা সিঙে সংবাদ মাধ্যমৰ সৈতে বাৰ্তালাপক পাকিস্তানৰ কাৰ্যকলাপৰ নিন্দা কৰি কয় যে পাকিস্তানে ভাৰতৰ সামৰিক সম্পত্তি ধ্বংসৰ মিছা দাবীৰে ভুল তথ্য প্ৰচাৰ কৰিছে, যিটো ভাৰতে কঠোৰভাৱে নাকচ কৰিছে। উইং কমাণ্ডাৰ সিঙে পাকিস্তানৰ ভুল তথ্যৰ প্ৰচাৰৰ বিষয়ে আলোকপাত কৰি কয় যে আধামপুৰৰ এছ-৪০০ ব্যৱস্থা, ছুৰাটগড়, ছিৰছাৰ বিমানবন্দৰ আদিৰ ক্ষতিৰ দাবী সম্পূৰ্ণ মিছা। তেওঁ লগতে কয় যে পাকিস্তানে নিয়ন্ত্ৰণ ৰেখাত সামৰিক কাৰ্যকলাপ তীব্ৰ কৰিছে, ড্ৰ’ন অনুপ্ৰৱেশৰ চেষ্টা আৰু গধুৰ  গোলাবৰ্ষণৰ জৰিয়তে অসামৰিক অঞ্চলত ভাবুকি সৃষ্টি কৰিছে।

মোদীৰ নেতৃত্বত ভাৰতে সামৰিক আৰু কূটনৈতিক প্ৰতিক্ৰিয়া তীব্ৰ কৰিছে, য’ত সিন্ধু জল সন্ধি স্থগিত, পাকিস্তানী বিমানৰ ওপৰত নিষেধাজ্ঞা আৰু বাণিজ্যিক সীমাবদ্ধতা অন্তৰ্ভুক্ত। শনিবাৰে সীমান্তৱৰ্তী অঞ্চলত প্ৰচণ্ড গোলাবৰ্ষণ আৰু সীমা অতিক্ৰম কৰি গুলীচালনাৰ খবৰ পোৱা গৈছে। আন্তঃৰাষ্ট্ৰীয় সম্প্ৰদায়ৰ পৰা সংযমৰ আহ্বান কৰিছে যদিও, ভাৰতে সন্ত্ৰাসবাদৰ বিৰুদ্ধে কঠোৰ হস্তক্ষেপৰ প্ৰতিশ্ৰুতি অব্যাহত ৰাখিছে। এই বৈঠকে ভাৰতৰ দৃঢ় স্থিতি আৰু পৰৱৰ্তী পদক্ষেপৰ পৰিকল্পনাৰ ইংগিত বহন কৰিছে, যাৰ ফলত ভাৰত-পাকিস্তান সম্পৰ্কই এতিয়া এক গুৰুত্বপূৰ্ণ সন্ধিক্ষণত উপনীত হৈছে।