মেঘালয়ত ৰাজা ৰঘুবংশীৰ হত্যা, জামিন আবেদন দাখিল সোণমৰ; চাৰ্জ শ্বীটত ‘ত্ৰুটি’ থকাৰ দাবী

মেঘালয়ত হানিমুনৰ সময়ত স্বামী ৰাজা ৰঘুবংশীক হত্যা কৰাৰ অভিযোগত অভিযুক্ত সোণম ৰঘুবংশীয়ে জামিন আৱেদন দাখিল কৰিছে।

চোহৰা মহকুমাৰ প্ৰথম শ্ৰেণীৰ ন্যায়িক দণ্ডাধীশে তেওঁৰ আবেদনৰ শুনানিৰ বাবে ১৭ ছেপ্টেম্বৰ ধাৰ্য কৰিছে।

অতিৰিক্ত চৰকাৰী প্ৰচিকিউটৰ তুষাৰ চন্দ্ৰই কয় যে শুকুৰবাৰেই এই আবেদন দাখিল কৰা হৈছিল যদিও বিচাৰকে গোচৰৰ ৰেকৰ্ড পৰীক্ষা কৰিবলৈ সময় বিচাৰিছিল।

ইন্দোৰৰ ব্যৱসায়ী ৰাজা ৰঘুবংশীৰ হত্যাকাণ্ডৰ গোচৰত দাখিল কৰা অভিযোগনামাত “ত্ৰুটি” আছে বুলি দাবী কৰিছে সোণমৰ অধিবক্তাই।

ৰাজ্যখনত হানিমুনলৈ যোৱাৰ সময়তে ছ’হৰাৰ ৱেইছ’ডঙৰ সমীপৰ নিৰ্জন পাৰ্কিং ল’টত তিনিজন ভাৰাতীয়া গুণ্ডাই ৰাজা ৰঘুবংশীক হত্যা কৰে। তেওঁৰ পত্নী আৰু প্ৰেমিক ৰাজ কুশৱাহাই হত্যাকাণ্ডৰ পৰিকল্পনা কৰা বুলি অভিযোগ উঠিছে।

মে’ মাহত মেঘালয়ৰ পৰা ৰাজা আৰু সোণম নিৰুদ্দেশ হোৱাৰ ফলত দেশজুৰি তালাচী অভিযান আৰম্ভ হয়। অৱশেষত ৰাজাৰ মৃতদেহ উদ্ধাৰ হয় আৰু মেঘালয়ৰ পৰা অহা তদন্তকাৰীয়ে আন অভিযুক্তক গ্ৰেপ্তাৰ কৰাৰ সময়তে সোণমে উত্তৰ প্ৰদেশৰ আৰক্ষীৰ আগত আত্মসমৰ্পন কৰে।

যোৱা সপ্তাহত আৰক্ষীয়ে সোণম, ৰাজ আৰু তিনিজন ভাৰাতীয়া হত্যাকাৰী বিশাল সিং চৌহান, আকাশ ৰাজপুত, আৰু আনন্দ কুৰ্মীৰ বিৰুদ্ধে ৭৯০ পৃষ্ঠাৰ অভিযোগনামা দাখিল কৰিছিল।