ত্ৰিপুৰাত ১৮ জুনত লোকসভা নিৰ্বাচনৰ ৰণডংকা বজাব বিজেপি সভাপতি অমিত শ্বাহে

কাৰ্যতঃ সমাগত লোকসভা নিৰ্বাচনৰ ৰণডংকা বজাবলৈ অহা ১৮ জুনত উত্তৰ- পূবৰ অন্যতম ৰাজধানী ত্ৰিপুৰাত উপস্থিত হ’ব বিজেপিৰ ৰাষ্ট্ৰীয় সভাপতি অমিত শ্বাহ।
ত্ৰিপুৰা বিধানসভাৰ বাজেট অধিৱেশনৰ প্ৰাক্ সন্ধিয়া ৰাজ্যখনত উপস্থিত হ’বলগীয়া অমিত শ্বাহৰ আগমন উপলক্ষে ইতিমধ্যে যাৱতীয় সকলো প্ৰস্তুতি সম্পূৰ্ণ কৰিছে মুখ্য মন্ত্ৰী বিপ্লৱ কুমাৰ দেৱ নেতৃত্বাধীন চৰকাৰখনে।

উল্লেখযোগ্য যে এই ভ্ৰমণৰ সময়ছোৱাতে বিজেপিৰ ৰাষ্ট্ৰীয় সভাপতি গৰাকীয়ে ত্ৰিপুৰাৰ বিজেপি-আই পি এফ টি মিত্ৰজোঁট চৰকাৰৰখনৰ ১০০ দিনীয়া পূৰ্তিৰ খতিয়ান ল’ব।

প্ৰসংগক্ৰমে উল্লেখযোগ্য যে ত্ৰিপুৰাৰ মুখ্য মন্ত্ৰী ৰূপে শপত গ্ৰহণ কৰাৰ পাছতে বিপ্লৱ কুমাৰ দেৱে তেওঁৰ মন্ত্ৰী সভাই জনকল্যানৰ বাবে কৰা ১০০ দিনীয়া কামৰ খতিয়ান দাঙি ধৰিব বুলি উল্লেখ কৰিছিল। আনহাতে একেটা ভ্ৰমণসূচীতে শ্বাহে প্ৰদেশ বিজেপিৰ নেতৃবৃন্দৰ সৈতে এখন বৈঠকত মিলিত হ’ব বুলি প্ৰকাশ কৰিছে দলটোৰ শীৰ্ষ সূত্ৰই।এই বৈঠকতে সমাগত বৰ্ষত অনুষ্ঠিত হ’বলগীয়া লোকসভা নিৰ্বাচনৰ ৰণনীতি প্ৰস্তুত কৰা হৈছে বুলি জানিব পৰা গৈছে।

মনকৰিবলগীয়া বিষয় এইটোৱে যে অমিত শ্বাহক এই ভ্ৰমণৰ সময়ছোৱাত মিত্ৰজোঁটৰ অন্যতম অংশীদাৰী দল আইপিএফটিৰ এটা সঁজাতী দলে সাক্ষাৎ কৰি তেওঁলোকৰ বিভিন্ন সমস্যাৰ বিষয়ে অৱগত কৰিব বুলি জানিব পৰা গৈছে।