এআইৰ সহায়ত হাজাৰৰো দুৰাৰোগ্য আৰু বিৰল ৰোগ চিনাক্ত কৰা সম্ভৱ: গৱেষকৰ দাবী

চিকিৎসা বিজ্ঞানৰ ক্ষেত্ৰত এক যুগান্তকাৰী উদ্ভাৱন! কৃত্ৰিম বুদ্ধিমত্তা (এআই)ৰ সহায়ত হাজাৰৰো অধিক দুৰাৰোগ্য আৰু বিৰল ৰোগ চিনাক্ত কৰিব পৰা এক নতুন মডেল উদ্ভাৱন কৰা হৈছে। ব্ৰিটেইন, জাৰ্মানী আৰু চুইজাৰলেণ্ডৰ বিজ্ঞানীসকলে একেলগে এই গৱেষণা সম্পন্ন কৰি দাবী কৰিছে যে এই এআই সঁজুলিটোৱে ভৱিষ্যতে বহুতো জটিল ৰোগৰ নিৰাময়ৰ পথ প্ৰশস্ত কৰিব পাৰে। গৱেষণা পত্ৰ বিখ্যাত আলোচনী ‘দ্য নেচাৰ’ত প্ৰকাশিত হৈছে।

গৱেষকসকলে বিশ্বৰ বিভিন্ন দেশৰ বায়’বেংকত সংৰক্ষিত তথ্যৰ ভিত্তিত এটা উন্নত এলগৰিদম প্ৰস্তুত কৰিছে। এই এলগৰিদমে যিকোনো বিৰল বা নিৰাময় কৰিব নোৱাৰা ৰোগ চিনাক্ত কৰাৰ লগতে ইয়াৰ সম্ভাৱ্য চিকিৎসা পদ্ধতিও সূচিত কৰিব পাৰিব। নতুন সঁজুলিটোৰ নাম ‘ডেলফি-২এম এআই’। ইয়াত হাজাৰ হাজাৰ ৰোগৰ তথ্য সন্নিবিষ্ট কৰা হৈছে, যাৰ ফলত ই বিৰল জিনীয় ৰোগসমূহো সহজে ধৰা পেলাব পাৰিব। গৱেষকসকলে কয় যে এই যন্ত্ৰটোৱে কোষৰ ডি এন এত ঘটা বৃহৎ পৰিৱৰ্তন বা ৰাসায়নিক মিউটেচন চিনাক্ত কৰি ৰোগৰ কাৰণ বিচাৰি উলিয়াব পাৰে।

চিকিৎসাৰ ক্ষেত্ৰত কৃত্ৰিম বুদ্ধিমত্তাৰ ভূমিকা ক্ৰমান্বয়ে বৃদ্ধি পাইছে। ইতিমধ্যে হৃদৰোগ বা কেন্সাৰৰ সম্ভাৱনা আগতীয়াকৈ ধৰা পেলোৱাত এআই সঁজুলি ব্যৱহাৰ হৈ আহিছে। গৱেষকসকলে জনোৱা মতে, যিকোনো দুৰাৰোগ্য ৰোগত ডি এন এত ঘটা পৰিৱৰ্তনসমূহ এআইয়ে সঠিকভাৱে চিনাক্ত কৰিব পাৰে, যিটো মানুহৰ পক্ষে জটিল। বৰ্তমান এই সঁজুলিটো পৰীক্ষামূলকভাৱে ব্যৱহাৰ কৰা হৈছে। কম্পিউটাৰৰ এলগৰিদমে সঠিকভাৱে কাম কৰা আৰু ৰোগ চিনাক্ত কৰাত সফল হোৱা নিশ্চিত কৰিবলৈ গৱেষকসকলে তীক্ষ্ণ দৃষ্টি ৰাখিছে।

গৱেষকসকলৰ মতে, এই পদ্ধতি সফল হ’লে কেইবাটাও বিৰল আৰু মাৰাত্মক ৰোগ নিৰাময় কৰা সম্ভৱ হ’ব। ইয়াৰ উপৰিও অধিক উন্নত চিকিৎসা গৱেষণাৰ সুবিধা হ’ব। এই আৱিষ্কাৰে চিকিৎসা জগতত নতুন আশাৰ সঞ্চাৰ কৰিছে, যিটোৱে লাখ লাখ ৰোগীৰ জীৱন ৰক্ষা কৰিব পাৰে। গৱেষণা দলটোৱে ভৱিষ্যতে এই সঁজুলিটোক অধিক উন্নত কৰি ব্যৱহাৰিক ৰূপ দিয়াৰ পৰিকল্পনা কৰিছে।