তৃতীয় লিংগৰ অধিকাৰ সুৰক্ষাৰ বাবে কঠোৰ নির্দেশনা উচ্চতম ন্যায়ালয়ৰঃ কেন্দ্ৰ আৰু ৰাজ্য চৰকাৰক সমালোচনা

দেশৰ তৃতীয় লিংগ ব্যক্তিসকলৰ প্ৰতি কেন্দ্ৰীয় আৰু ৰাজ্য চৰকাৰে গ্ৰহণ কৰা “উদাসীনতা”ক তীব্ৰ সমালোচনা উচ্চতম ন্যায়ালয়ৰ। ন্যায়ালয়ৰ বিচাৰপীঠে শেহতীয়া এক ৰায়দানত ঐতিহাসিক এক পদক্ষেপ গ্ৰহণ কৰিছে। সমান সুযোগ নীতি প্ৰস্তুত কৰাৰ বাবে এটা উচ্চস্তৰীয় পৰামৰ্শদাতা সমিতি গঠন কৰাৰ নিৰ্দেশ দিছে উচ্চতম ন্যায়ালয়ে।

ঘটনাক্ৰম অনুসৰি উত্তৰ প্ৰদেশ আৰু গুজৰাটৰ বিদ্যালয়ৰ পৰা লিংগ পৰিচয়ৰ ভিত্তিত বাদ পৰাৰ অভিযোগ কৰি এগৰাকী ৰূপান্তৰকামী মহিলাই উচ্চতম ন্যায়ালয়ৰ শৰণাপন্ন হৈছিল। ন্যায়াধীশ জে বি পাৰ্দিৱালা আৰু আৰ মহাদেৱানৰ বিচাৰপীঠে এই গোচৰৰ শুনানি সময়ত ৰূপান্তৰকামী মহিলাগৰাকীৰ দাবী মঞ্জুৰ কৰে আৰু বৈষম্যৰ অভিযোগ সত্য প্ৰমাণিত হোৱাত কেন্দ্ৰীয় চৰকাৰ, উত্তৰ প্ৰদেশ চৰকাৰ, গুজৰাট চৰকাৰ আৰু সংশ্লিষ্ট বিদ্যালয়ক আবেদনকাৰীক ৫০ হাজাৰ টকাৰ ক্ষতিপূৰণ দিবলৈ নিৰ্দেশ দিয়ে।

উল্লেখ্য যে ১৭৭ পৃষ্ঠাৰ ৰায়দানত আদালতে পৰ্যবেক্ষণ কৰে যে হিজড়া ব্যক্তিৰ অধিকাৰ সুৰক্ষা আইন, ২০১৯ আৰু এই আইনৰ অধীনত গৃহীত নিয়মসমূহ বাস্তৱত কার্যকৰী নহয়। স্বাস্থ্য সেৱা, শিক্ষা, চাকৰি আৰু ৰাজহুৱা স্থান ব্যৱহাৰৰ ক্ষেত্ৰত তেওলোক এতিয়াও গুৰুতৰ বৈষম্য আৰু অৱহেলাৰ সন্মুখীন হৈছে বুলি বিচাৰপীঠে মত পোষণ কৰে।

বিচাৰপীঠে আৰু উল্লেখ কৰিছে যে ২০১৪ চনৰ নালছা (NALSA) ৰায়ত হিজড়া সম্প্ৰদায়ক “তৃতীয় লিংগ” হিচাপে স্বীকৃতি দিয়া হৈছিল। শিক্ষা আৰু চাকৰিত সংৰক্ষণ, স্বাস্থ্য সুৰক্ষা, পৃথক শৌচাগাৰ, সামাজিক সুৰক্ষা আদি বিষয়ে নির্দেশনা দিয়া হৈছিল। কিন্তু আজি দহ বছৰ পাৰ হৈ যোৱাৰ পিছতো মূল সমস্যাবোৰ সমাধান নোহোৱাত আদালতে দুঃখ প্ৰকাশ কৰে।

ইয়াৰোপৰি তৃতীয় লিংগৰ লোকসকলৰ অধিকাৰ সুৰক্ষাৰ ক্ষেত্ৰত যথোপযুক্ত নীতিৰ অভাৱৰ সমাধান কৰিবলৈ আদালতে দিল্লীৰ প্ৰাক্তন উচ্চ ন্যায়ালয়ৰ ন্যায়াধীশ আশা মেননৰ নেতৃত্বত এখন পৰামৰ্শদাতা সমিতি গঠন কৰাৰ নিৰ্দেশ দিছে। এই সমিতিয়ে ছমাহৰ ভিতৰত:

সমান সুযোগ নীতিৰ খচৰা প্ৰস্তুত কৰিব,

শিক্ষা, স্বাস্থ্য আৰু সমাজকল্যাণৰ ক্ষেত্ৰত পৰামৰ্শ প্ৰস্তুত কৰিব,

বৈষম্য ৰোধ আৰু অধিকাৰ সুৰক্ষা নিশ্চিত কৰিবলৈ পদক্ষেপ ধাৰ্য্য কৰিব।

আাৰু সমিতিৰ প্ৰতিবেদন লাভ কৰাৰ তিনি মাহৰ ভিতৰত কেন্দ্ৰীয় চৰকাৰে নীতি ঘোষণা কৰিব লাগিব।

উচ্চতম ন্যায়ালয়ে লগতে তৎক্ষণাত কাৰ্যকৰী কৰা কামবোৰৰ বাবে কেইবাটাও নিৰ্দেশ জাৰি কৰে—

প্ৰতিখন ৰাজ্য আৰু কেন্দ্ৰশাসিত অঞ্চলত তৃতীয় লিংগৰ লোকসকলৰ কল্যাণ বোর্ড গঠন

প্ৰতিখন জিলাত জিলা দণ্ডাধীশৰ অধীনত তৃতীয় লিংগৰ সুৰক্ষা কোষ স্থাপন

২০১৯ চনৰ আইন লঙ্ঘনৰ অভিযোগৰ বাবে দেশব্যাপী ২৪ ঘণ্টাৰ টোল-ফ্ৰী হেল্পলাইন স্থাপন

সকলো ৰাজ্যই খচৰা লাভ কৰাৰ তিনি মাহৰ ভিতৰত নিজা নীতিনিৰ্দেশনা জাৰি কৰিব লাগিব বুলি সদৰী কৰিছে ন্যালয়ে।