ভেনিজুৱেলাৰ পৰিস্থিতিক লৈ ৰাষ্ট্ৰসংঘৰ নিৰাপত্তা পৰিষদত জৰুৰী বৈঠক

ভেনিজুৱেলাৰ ৰাষ্ট্ৰপতি নিকোলাছ মাদুৰোক আমেৰিকাই আটক কৰি নিউয়ৰ্কলৈ স্থানান্তৰ কৰা বুলি উত্থাপিত দাবীক কেন্দ্ৰ কৰি বিশ্বজুৰি তীব্ৰ চাঞ্চল্যৰ সৃষ্টি হৈছে। বিভিন্ন আন্তঃৰাষ্ট্ৰীয় সংবাদ মাধ্যমৰ প্ৰতিবেদন অনুসৰি, শনিবাৰে ভেনিজুৱেলাত চলোৱা এক বিশেষ সামৰিক অভিযানত মাদুৰো আৰু তেওঁৰ পত্নীক আমেৰিকান বিশেষ বাহিনীয়ে আটক কৰে। পৰৱৰ্তী সময়ত দেওবাৰে তেওঁলোকক নিউয়ৰ্কলৈ নিয়া হয় বুলি জানিব পৰা গৈছে।

আমেৰিকাৰ এটৰ্নী জেনেৰেল পেম বণ্ডীয়ে সংবাদ মাধ্যমৰ আগত সদৰী কৰা মতে, মাদুৰো আৰু তেওঁৰ পত্নীক নিউয়ৰ্কৰ দক্ষিণ অংশত অৱস্থিত এখন সংশোধনাগাৰত ৰখা হৈছে। অৱশ্যে এই আটক কোনটো নিৰ্দিষ্ট অভিযোগৰ ভিত্তিত কৰা হৈছে, সেই সন্দৰ্ভত আমেৰিকা চৰকাৰে এতিয়ালৈকে কোনো আনুষ্ঠানিক তথ্য ৰাজহুৱা কৰা নাই।

আমেৰিকা প্ৰশাসনৰ মতে, মাদুৰোৰ বিৰুদ্ধে নিচাযুক্ত সামগ্ৰীৰ চোৰাং ব্যৱসায়েৰে সন্ত্ৰাসবাদত ইন্ধন যোগোৱাৰ অৰ্থাত ‘নাৰ্কো-টেৰৰিজম’ (Narco-terrorism) আৰু আন্তঃৰাষ্ট্ৰীয় অস্ত্ৰ সৰবৰাহৰ সৈতে জড়িত থকাৰ পুৰণি অভিযোগ আছে। এটৰ্নী জেনেৰেলৰ দাবী অনুসৰি, মাদুৰো চৰকাৰ এক বিশাল আন্তঃৰাষ্ট্ৰীয় ড্ৰাগছ চক্ৰৰ সৈতে জড়িত আছিল। এই সন্দৰ্ভত মাদুৰো, তেওঁৰ পত্নী আৰু পুত্ৰসহ মুঠ ছয়জন ব্যক্তিৰ বিৰুদ্ধে গোচৰ ৰুজু কৰা হৈছে।

ইফালে, এই ঘটনাৰ পাছতেই ভেনিজুৱেলাত জৰুৰীকালীন অৱস্থা ঘোষণা কৰা হৈছে। স্থানীয় লোকসকলৰ মতে, শুকুৰবাৰে মাজনিশা সংঘটিত হোৱা সামৰিক অভিযানৰ পাছতো অঞ্চলটোৰ পৰা আমেৰিকাৰ সেনা আঁতৰি যোৱা নাই। বৰঞ্চ আকাশমাৰ্গত এতিয়াও আমেৰিকাৰ সামৰিক বিমানৰ উপস্থিতি পৰিলক্ষিত হৈছে।

ভেনিজুৱেলাত আমেৰিকাৰ এই সামৰিক ভূমিকা আৰু শেহতীয়া ঘটনাক লৈ ৰাষ্ট্ৰসংঘৰ নিৰাপত্তা পৰিষদত (UNSC) এখন জৰুৰী বৈঠক আহ্বান কৰা হৈছে। কলম্বিয়াৰ অনুৰোধত এই বৈঠকৰ অনুমোদন দিয়া হৈছে। গুৰুত্বপূৰ্ণ কথাটো হ’ল যে নিৰাপত্তা পৰিষদৰ স্থায়ী সদস্য ৰাছিয়া আৰু চীনৰ দৰে দেশেও এই বৈঠকৰ বাবে সমৰ্থন আগবঢ়াইছে। কূটনৈতিক মহলৰ মতে, এই বৈঠকত আন্তঃৰাষ্ট্ৰীয় আইন আৰু ৰাষ্ট্ৰসংঘৰ চনদ উলংঘাৰ দৰে গুৰুতৰ বিষয়সমূহ উত্থাপন হোৱাৰ সম্ভাৱনা আছে।