সাংবাদিক হত্যাকাণ্ডৰ গোচৰত দোষমুক্ত হ’ল ভণ্ড বাবা ৰাম ৰহিম

পঞ্জাৱ আৰু হাৰিয়ানা উচ্চ ন্যায়ালয়ে ডেৰা সচা সৌদাৰ মুৰব্বী গুৰমিত ৰাম ৰহিম সিংহক ২০০২ চনত এজন সাংবাদিক হত্যাকাণ্ডৰ গোচৰৰ পৰা দোষমুক্ত ঘোষণা কৰিছে। শনিবাৰে অৰ্থাৎ ২০২৬ চনৰ ৭ মাৰ্চত ধৰ্মীয় নেতাগৰাকীৰ অধিবক্তা জীতেন্দ্ৰ খুৰানাই এই গুৰুত্বপূৰ্ণ ৰায়দানৰ কথা ৰাজহুৱা কৰে। নিম্ন আদালতে তেওঁক দোষী সাব্যস্ত কৰি যাৱজ্জীৱন কাৰাদণ্ড বিহাৰ প্ৰায় সাত বছৰৰ পাছত উচ্চ ন্যায়ালয়ে এই ৰায় প্ৰদান কৰিছে। অধিবক্তা খুৰানাই জনোৱা মতে সাংবাদিক ৰাম চন্দৰ ছত্ৰপতিৰ হত্যাকাণ্ডৰ অভিযোগৰ পৰা ৰাম ৰহিমক সম্পূৰ্ণৰূপে মুক্তি দিয়া হৈছে।

উল্লেখ্য যে ২০১৯ চনত সাংবাদিকগৰাকীক হত্যা কৰাৰ অপৰাধত ৰাম ৰহিমৰ লগতে আন তিনিজন লোকক দোষী সাব্যস্ত কৰা হৈছিল। হাৰিয়ানাৰ ছিৰসাৰ নিজগৃহৰ সন্মুখতে ২০০২ চনৰ অক্টোবৰ মাহত ছত্ৰপতিক গুলীয়াই হত্যা কৰা হৈছিল। ছত্ৰপতিৰ সংবাদ পত্ৰ পুৰা সচত ডেরাৰ সদৰত মহিলা অনুগামীসকলক যৌন উৎপীড়ন চলোৱাৰ অভিযোগ উত্থাপন কৰি এখন বেনামী পত্ৰ প্ৰকাশ কৰাৰ পাছতেই এই আক্ৰমণৰ ঘটনা সংঘটিত হৈছিল।

সাংবাদিক হত্যাকাণ্ডৰ পৰা ৰেহাই পালেও গুৰমিত ৰাম ৰহিম সিংহে বৰ্তমান কাৰাগাৰতে থাকিব লাগিব। ২০১৭ চনত দুজনী মহিলা শিষ্যক ধৰ্ষণ কৰাৰ অপৰাধত তেওঁক ২০ বছৰৰ সশ্ৰম কাৰাদণ্ড বিহা হৈছিল আৰু বৰ্তমান তেওঁ হাৰিয়ানাৰ ৰোৰ্টকৰ সুনৰিয়া জেলত বন্দী হৈ আছে। আজিৰ এই ৰায়দানৰ পাছত সমগ্ৰ দেশজুৰি মিশ্ৰিত প্ৰতিক্ৰিয়াৰ সৃষ্টি হৈছে।