১২ গৰাকী মন্ত্ৰীয়ে শপত লোৱাৰ পিছতেই কেবিনেট বৈঠকৰ আহ্বান মুখ্যমন্ত্ৰীৰ

৫ জুন তাৰিখে গুৱাহাটীৰ জ্যোতি-বিষ্ণু আন্তৰ্জাতিক কলা মন্দিৰত এক বিশেষ অনুষ্ঠানৰ জৰিয়তে অসমৰ মন্ত্ৰীসভা সম্প্ৰসাৰিত কৰা হৈছে। মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত চলি থকা এন ডি এ চৰকাৰে নিৰ্বাচনত জয়লাভ কৰাৰ পিছত এইবাৰ প্ৰথমবাৰৰ বাবে মন্ত্ৰীসভাত নতুন সদস্য অন্তৰ্ভুক্ত কৰিছে। ৰাজ্যপাল লক্ষ্মণ প্ৰসাদ আচাৰ্যই দুপৰীয়া ১২:৪৫ বজাত মুঠ ১২ গৰাকী বিধায়কক মন্ত্ৰী হিচাপে শপত গ্ৰহণ কৰায়।

নতুনকৈ মন্ত্ৰিত্ব লাভ কৰা এই ১২ গৰাকী সদস্যৰ ভিতৰত ডাঃ ৰণোজ পেগু, পীযূষ হাজৰিকা, বিমল বৰা, অশ্বিনী ৰায় সৰকাৰ, বিশ্বজিৎ দৈমাৰী, কৃষ্ণেন্দু পাল, অশোক সিংহল, জয়ন্ত মল্ল বৰুৱা, নীলিমা দেৱী, কৌশিক ৰায়, সুশান্ত বৰগোহাঁই আৰু কেশৱ মহন্ত আছে। মন কৰিবলগীয়া যে এই ১২ জনৰ ভিতৰত ৪ গৰাকীয়ে প্ৰথমবাৰৰ বাবে মন্ত্ৰী হিচাপে দায়িত্ব লৈছে।

মন্ত্ৰীসভা সম্প্ৰসাৰণৰ ঠিক পিছতেই আজি সন্ধিয়া ৬ বজাত মুখ্যমন্ত্ৰীৰ অধ্যক্ষতাত এখন গুৰুত্বপূৰ্ণ কেবিনেট বৈঠক অনুষ্ঠিত হ’ব। এইখন হৈছে নতুন মন্ত্ৰীসভাৰ প্ৰথমখন বৈঠক, য’ত নতুনকৈ শপত লোৱা মন্ত্ৰীসকলো উপস্থিত থাকিব। ৰাজ্য চৰকাৰৰ সকলো মন্ত্ৰীয়ে অংশগ্ৰহণ কৰিবলগীয়া এই বৈঠকখনক লৈ ৰাজনৈতিক আৰু সামাজিক ক্ষেত্ৰত ব্যাপক চৰ্চা চলিছে। এই বৈঠকতে সাধাৰণ জনতাৰ হিতৰ বাবে চৰকাৰে কেইবাটাও গুৰুত্বপূৰ্ণ সিদ্ধান্ত গ্ৰহণ কৰিব পাৰে বুলি সকলোৱে আশা কৰিছে।