বাংলাদেশ সীমান্তত ঘাঁহ কাটিবলৈ গৈ অপহৃত হ’ল ভাৰতীয় নাগৰিকক ঘূৰাই দিলে বাংলাদেশে

মঙলবাৰে নিশা বাংলাদেশৰ কৰ্তৃপক্ষই এগৰাকী ভাৰতীয় লোকক ভাৰতীয় কৰ্তৃপক্ষৰ হাতত অৰ্পণ কৰে। মঙলবাৰে দিনৰ ভাগত আন্তঃৰাষ্ট্ৰীয় সীমান্তৰ পৰা বাংলাদেশৰ একাংশ লোকে এই লোকজনক অপহৰণ কৰি লৈ গৈছিল।

অপহৃত লোকজন অসমৰ কাছাৰ জিলাৰ বাসিন্দা ৰঞ্জিত দাস বুলি চিনাক্ত কৰা হৈছে। সূত্ৰৰ পৰা জানিব পৰা মতে, মঙলবাৰে পুৱা সীমান্তৱৰ্তী অঞ্চলৰ পৰা ঘাঁহ সংগ্ৰহ কৰিবলৈ গৈ নিৰুদ্দেশ হৈছিল ৰঞ্জিত দাস।

স্থানীয় লোকে অভিযোগ কৰা অনুসৰি সিপাৰৰ পৰা অহা এটা দলে তেওঁক অপহৰণ কৰি লৈ যোৱাৰ ফলত অঞ্চলটোত তীব্ৰ উত্তেজনাৰ সৃষ্টি হৈছিল। আৰক্ষীৰ এক সূত্ৰই প্ৰকাশ কৰা অনুসৰি মঙলবাৰে নিশা প্ৰায় দহ বজাত বাংলাদেশ বৰ্ডাৰ গাৰ্ডে অপহৃত ৰঞ্জিত দাসক ভাৰতীয় কৰ্তৃপক্ষৰ হাতত গটাই দিয়ে। জানিব পৰা মতে, তেওঁ যিটো স্থানলৈ গৈছিল সেয়া আছিল সীমান্তৰ কাঁইটীয়া তাঁৰৰ সিপাৰে থকা ভাৰতীয় ভূখণ্ড, যাক জিৰ’ পইণ্ট বুলি জনা যায়। সেই স্থানৰ পৰাই বাংলাদেশী নাগৰিকে তেওঁক অপহৰণ কৰিছিল।

আনহাতে, অসমৰ দক্ষিণ শালমাৰা-মানকাচৰ জিলাৰ সমীপৰ ভাৰত-বাংলাদেশ সীমান্তৰ কোনো মানুহ নথকা অঞ্চলত বাংলাদেশৰ ৯ গৰাকী সন্দেহযুক্ত অবৈধ অনুপ্ৰৱেশকাৰী আবদ্ধ হৈ পৰে। এই সমস্যাটো সমাধানৰ বাবে দুয়োখন দেশৰ সীমান্তৰক্ষী বাহিনীৰ মাজত এখন ফ্লেগ মিটিং বা পতাকা বৈঠক অনুষ্ঠিত হয়।