শান্তি চুক্তি উলংঘনৰ অভিযোগত ইৰানে বন্ধ কৰিলে হৰমুজ প্ৰণালী, দাবী আন্তঃৰাষ্ট্ৰীয় সংবাদ মাধ্যমৰ

শান্তি চুক্তি স্বাক্ষৰিত হোৱাৰ মাত্ৰ কেইদিনমানৰ পিছতে ইৰানে গুৰুত্বপূৰ্ণ হৰমুজ প্ৰণালী বন্ধ কৰি দিছে। আমেৰিকা যুক্তৰাষ্ট্ৰ আৰু ইজৰাইলৰ দ্বাৰা যুদ্ধবিৰতি চুক্তি উলংঘন কৰাৰ অভিযোগ উত্থাপন কৰি ইৰানে এই ডাঙৰ সিদ্ধান্ত গ্ৰহণ কৰিছে।

ইৰানৰ শীৰ্ষ সামৰিক কাৰ্যালয়ে শনিবাৰে জানিবলৈ দিয়ে যে এতিয়াৰে পৰা এই সাগৰীয় পথটোৰে কোনো ধৰণৰ জাহাজ চলাচল কৰিব নোৱাৰিব। তেওঁলোকে ইয়াক তেওঁলোকৰ প্ৰথম পদক্ষেপ বুলি অভিহিত কৰিছে আৰু সতৰ্ক কৰি দিছে যে যদিহে এই নিয়ম উলংঘনৰ প্ৰক্ৰিয়া অব্যাহত থাকে তেন্তে আগলৈ আৰু অধিক কঠোৰ ব্যৱস্থা গ্ৰহণ কৰা হ’ব।

আনহাতে ইজৰাইল আৰু লেবাননৰ সশস্ত্ৰ সংগঠন হিজবুল্লাহৰ মাজত তীব্ৰ সংঘাত বৃদ্ধি পাইছে। ইজৰাইলৰ বিমান আক্ৰমণত লেবাননত ৪৭ জন লোকৰ মৃত্যু হোৱাৰ খবৰ পোৱা গৈছে। একে সময়তে ইজৰাইলেও তেওঁলোকৰ চাৰিজন সৈনিক নিহত হোৱাৰ কথা ঘোষণা কৰিছে। এই ভয়াৱহ পৰিস্থিতিৰ বাবে শুকুৰবাৰে আমেৰিকা আৰু ইৰানৰ মাজত চলিবলগীয়া শান্তি আলোচনাও বাতিল কৰা হয়। যদিও পিছলৈ আমেৰিকাৰ এজন বিষয়াৰ মধ্যস্থতাত ইজৰাইল আৰু হিজবুল্লাহৰ মাজত পুনৰ এটা যুদ্ধবিৰতি চুক্তি সম্পন্ন হয়, তথাপিও সমগ্ৰ অঞ্চলটোত এতিয়া তীব্ৰ যুদ্ধৰ পৰিৱেশে বিৰাজ কৰিছে।