হলিউডৰ সোণালী যুগৰ অন্যতম জনপ্ৰিয় তাৰকা অভিনেত্ৰী এন ব্লাইথৰ দেহাৱসান

হলিউডৰ সোণালী যুগৰ অন্যতম জনপ্ৰিয় অভিনেত্ৰী এন ব্লাইথৰ দেহাৱসান ঘটিছে। বুধবাৰে ৯৮ বছৰ বয়সত তেওঁ শেষ নিশ্বাস ত্যাগ কৰে। প্ৰখ্যাত সাংবাদিক জৰ্জ পেনাচিঅ’ই তেওঁৰ মৃত্যুৰ খবৰ নিশ্চিত কৰিছে।

১৯৪৫ চনৰ ক্লাছিক ছবি ‘মিল্ড্ৰেড পিয়াৰ্চ’ত জোয়ান ক্ৰফৰ্ডৰ স্বাৰ্থপৰ আৰু নষ্ট কন্যাৰ চৰিত্ৰত অভিনয় কৰি তেওঁ বিশ্বব্যাপী ব্যাপক খ্যাতি অৰ্জন কৰে। এই দুৰ্দান্ত অভিনয়ৰ বাবে ব্লাইথে ১৯৪৬ চনত মাত্ৰ ১৭ বছৰ বয়সতে শ্ৰেষ্ঠ সহযোগী অভিনেত্ৰীৰ বাবে অস্কাৰৰ মনোনয়ন লাভ কৰিছিল।

নিউয়ৰ্কৰ মাউণ্ট কিস্কোত জন্মগ্ৰহণ কৰা এই কৃষ্ণবৰ্ণা সুন্দৰীগৰাকীয়ে কম বয়সতে থিয়েটাৰ আৰু অপেৰাৰ সৈতে জড়িত হৈ পৰিছিল। ১৯৪১ চনত ব্ৰডৱেৰ নাটক ‘ৱাচ অন দ্য ৰাইন’ত অভিনয়ৰ অভিষেক ঘটাই হলিউডৰ দৃষ্টি আকৰ্ষণ কৰিছিল।

১৯৪৪ চনত ডাঙৰ পৰ্দাত অভিষেক ঘটোৱাৰ পিছত ‘মিল্ড্ৰেড পিয়াৰ্চ’য়ে তেওঁৰ কেৰিয়াৰৰ গতি সলাই দিয়ে। পিছলৈ ব্ৰুট ফৰ্চ (১৯৪৭), দ্য গ্ৰেট কাৰুছ’ (১৯৫১), গ্ৰেগৰী পেকৰ বিপৰীতে দ্য ৱৰ্ল্ড ইন হিজ আৰ্মছ (১৯৫২) আৰু পল নিউমেনৰ সৈতে দ্য হেলেন মৰ্গান ষ্ট’ৰী (১৯৫৭) আদি সমালোচকৰ বহু প্ৰশংসিত ছবিত অভিনয় কৰে।

ব্লাইথে নিজৰ ব্যক্তিগত জীৱনত অতি সাহস প্ৰদৰ্শন কৰিছিল। ১৯৪৫ চনত আইচ স্লেডিং দুৰ্ঘটনাত তেওঁৰ মেৰুদণ্ড ভাঙি যায়। ডেৰ বছৰ হুইল চেয়াৰ আৰু বেক ব্ৰেচত পৰি থকাৰ পিছতো তেওঁ অভিনয় বন্ধ নকৰিলে।

১৯৫৭ চনৰ পিছত ডাঙৰ পৰ্দাৰ পৰা অৱসৰ গ্ৰহণ কৰিলেও   দ্য চাউণ্ড অৱ মিউজিক আৰু চাউথ পেচিফিকৰ দৰে জনপ্ৰিয় মিউজিকেল থিয়েটাৰ আৰু টেলিভিছনত নিয়মিতভাৱে কাম কৰি থাকিল। ২০০৭ চনত তেওঁৰ চিকিৎসক স্বামী জেমছ মেকনাল্টি মৃত্যু হয়।

মৃত্যুৰ সময়ত তেওঁ পাঁচটা সন্তান, দহগৰাকী নাতি-নাতিনী আৰু অগণন গুণমুগ্ধক এৰি থৈ যায়। তেওঁৰ মৃত্যুৰ লগে লগে হলিউডৰ এক গৌৰৱময় অধ্যায়ৰ অন্ত পৰিল।