মহিলা মল্লযুঁজাৰুৰ যৌন নিৰ্যাতনৰ অভিযোগৰ কোনো প্রমাণ নাই; দোষমুক্ত বিজেপিৰ ব্রিজ ভূষণ

মল্লযুঁজাৰুসকলৰ অভিযোগৰ ভিত্তিত দাখিল কৰা যৌন নিৰ্যাতনৰ গোচৰত সোমবাৰে বৃহৎ সকাহ লাভ কৰিলে ভাৰতীয় মল্লযুঁজ ফেডাৰেচনৰ প্ৰাক্তন সভাপতি তথা বিজেপিৰ প্ৰাক্তন সাংসদ ব্রিজ ভূষণ শৰণ সিঙে। তেওঁক দোষমুক্ত কৰি দিল্লী আদালতে কয় যে অভিযোগ প্ৰমাণ কৰিবলৈ গোচৰটোত পৰ্যাপ্ত আৰু নিৰ্ভৰযোগ্য তথ্য দাখিল কৰা নহ’ল। সেইবাবেই ব্রিজ ভূষণ শৰণ সিঙক দোষমুক্ত কৰাৰ সিদ্ধান্ত লোৱা হৈছে৷

দিল্লীৰ ৰাউছ এভিনিউ আদালতৰ অতিৰিক্ত মুখ্য ন্যায়িক দণ্ডাধীশ অশ্বিনী পানোৱাৰে ব্রিজ ভূষনক মুক্তিৰ নির্দেশ দিছে৷ ব্রিজ ভূষণৰ লগতে এই গোচৰৰ আন এজন অভিযুক্ত বিনোদ তোমৰকো মুকলি কৰি দিয়া হৈছে৷ তেওঁ ভাৰতীয় মল্লযুঁজ ফেডাৰেচনৰ প্ৰাক্তন সহকাৰী সচিব।

২০২৩ চনত দেশৰ কেইবাগৰাকীও শীৰ্ষস্থানীয় মহিলা মল্লযুঁজাৰুৱে ব্রিজ ভূষনৰ বিৰুদ্ধে যৌন নিৰ্যাতনৰ অভিযোগ উত্থাপন কৰিছিল৷ ২০২৪ চনৰ মে’ মাহত ব্ৰিজভূষণৰ বিৰুদ্ধে যৌন নিৰ্যাতনৰ অভিযোগত গোচৰ ৰুজু হৈছিল। এই অভিযোগক লৈ দিল্লীৰ যন্তৰ মন্তৰতো দীৰ্ঘদিন ধৰি প্ৰতিবাদ সাব্যস্ত হৈছিল। সেই আন্দোলনে সমগ্ৰ দেশতে এক বৃহৎ আলোড়নৰ সৃষ্টি কৰাৰ লগতে ক্ৰীড়া সমাজতো তীব্ৰ বিতৰ্কৰ সৃষ্টি কৰিছিল।

এই অভিযোগৰ ভিত্তিত দিল্লী আৰক্ষীয়ে তদন্ত আৰম্ভ কৰে আৰু আদালতত অভিযোগনামাও দাখিল কৰা হয়। দীৰ্ঘদিনীয়া শুনানিৰ অন্তত অৱশেষত আদালতে এই গোচৰৰ পৰা ব্ৰিজভূষণ শৰণ সিঙক দোষমুক্ত কৰে।

অৱশ্যে এই আদালতৰ ৰায়দানৰ পিছত এই বিষয়টোক লৈ ৰাজনৈতিক আৰু ক্ৰীড়া মহলত নতুন আলোচনা আৰম্ভ হৈছে। এই ৰায়ৰ বিৰুদ্ধে অভিযোগকাৰীসকলে উচ্চ ন্যায়ালয়ৰ কাষ চাপিব নে নাই সেয়া লক্ষ্যণীয় হ’ব।

আজি দোষমুক্ত হোৱাৰ পিছত আদালতৰ পৰা ওলাই অহাৰ পিছত ব্রিজভূষণ শৰণ সিঙে প্রথম প্রতিক্রিয়াত কয়, ‘মই প্রথম দিনাই কৈছিলোঁ যে মোৰ বিৰুদ্ধে উত্থাপিত কোনো অভিযোগ প্রমাণ হ’লে মই নিজেই ফাঁচীত ওলমিম৷ আজি আদালতে মোক সন্মানেৰে দোষমুক্ত ঘোষণা কৰিছে।’