বৰপেটা সাহিত্য সভা ভৱনত দীনেশ দাসৰ গীতৰ পুথি ‘ছন্দশীলা’ উন্মোচন

বৰপেটা সাহিত্য সভাত গীতৰ পুথি ‘ছন্দশীলা’ আজি আনুষ্ঠানিকভাবে উন্মোচন কৰা হয়। বৰপেটা সাহিত্য সভাৰ প্ৰাক্তন সভাপতি তথা তাৰাবাৰী উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ দীনেশ দাস ৰচিত এই গীতৰ পুথিখন উন্মোচন কৰে বিশিষ্ট গীতিকাৰ সুশীল কুমাৰ দাসে।

অম্বিকাগিৰী-বাণীকান্ত বৰপেটা সাহিত্য সভা ভৱনত বিয়লি ৪ বজাত অনুষ্ঠিত গীতৰ পুথি উন্মোচনী সভাত পুথিখন উন্মোচন কৰি সুশীল কুমাৰ দাসে কয় যে স্মৃতিৰ পোহৰে জীৱন আলোকিত কৰি তোলে। কিছুমান স্মৃতি নাইবা বাস্তৱৰ ভেটিত গীত ৰচনা কৰা হয়। তদুপৰি গীতে জীৱনক আনন্দ দিয়া বুলিও মন্তব্য কৰে উন্মোচকগৰাকীয়ে।

গীতৰ পুথিখনৰ ৰচক দীনেশ দাসে নিজৰ বক্তব্যত কয় যে, সম্প্ৰতি সংগীতৰ নামত অশ্লীলতা বৃদ্ধিয়ে তেওঁক গীত লিখিবলৈ বাধ্য কৰাইছে।

বৰপেটা সাহিত্য সভাৰ সভাপতি উদ্ধৱ চন্দ্ৰ দাসৰ সভাপতিত্বত অনুষ্ঠিত গ্ৰন্থ উন্মোচনী সভাত বিশিষ্ট সাহিত্যিক অক্ষয় কুমাৰ মিশ্ৰ, ৰামকৃষ্ণ তালুকদাৰৰ লগতে কেবাগৰাকী বিশিষ্ট ব্যক্তি আৰু বহু সংখ্যক লোক উপস্থিত থাকে।