মণিপুৰত ৰাজ্যিক পৰ্যায়ৰ জনজাতীয় চলচ্চিত্ৰ মহোৎৱ আৰম্ভ

দেওবাৰৰ পৰা ইম্ফলৰ ট্ৰাইবেল ৰিচাৰ্ছ ইনষ্টিটিউটৰ প্ৰেক্ষাগৃহত ৰাজ্যিক পৰ্যায়ৰ প্ৰথমখন জনজাতীয় চলচ্চিত্ৰ মহোৎসৱ তিনিদিনীয়া কাৰ্যসূচীৰে আৰম্ভ হৈছে।

‘’শ্ৰেষ্ঠত্বৰ সন্ধানত’’ শীষৰ্ক থিমৰ অধীনত এই চলচ্চিত্ৰ মহোৎসৱখনিৰ আয়োজন কৰিছে মণিপুৰৰ ৰাজ্যিক পৰ্যায়ৰ জনজাতীয় চলচ্চিত্ৰ মহোৎসৱ সমিতিয়ে।

মণিপুৰ বিধানসভাৰ প্ৰাক্তন উপাধ্যক্ষ এম কে প্ৰেশ্ব’ সিমাৰীয়ে মুখ্য অতিথি হিচাপে উপস্থিত থকা শুভাৰম্ভ অনুষ্ঠানটোত সমাজ কৰ্মী থাংজামাঙ হাওকিপে বিশেষ অতিথি হিচাপে যোগদান কৰে।

আয়োজক সমিতিৰ সভাপতি ড০ গৈৰাংমেই তেওঁৰ আদৰণি ভাষণত কয় যে জনজাতীয় মহোৎসৱৰ প্ৰাথমিক উদ্দেশ্য হৈছে ৰাজ্যখনত বাস কৰা বিভিন্ন জনগোষ্ঠীসমূহৰ মাজত চলচ্চিত্ৰৰ মাজেৰে শান্তি আৰু একতা সুৰক্ষিত কৰা।

ড০ গৈৰাংমেই লগতে কয় যে শান্তিৰ অবিহনে একোৱেই সম্ভৱ নহয়। ‘’দৰিদ্ৰতা, হিংসা, সংঘাত আৰু অন্যান্য বিভিন্ন ধৰণৰ সমস্যাই জনজাতীয় জীৱনক এতিয়াও জুমুৰি দি ধৰি আছে।‘’

অনুষ্ঠানত ভাষণ দি মণিপুৰ বিধানসভাৰ প্ৰাক্তন উপাধ্যক্ষ এম কে প্ৰেশ্ব’ সিমাৰীয়ে আঙুলিয়াই দিয়ে যে জনজাতীয় লোকসকল গান,নৃত্য আৰু কথা কোৱাৰ ক্ষেত্ৰত অতি প্ৰতিভাসম্পন্ন। ‘’এইধৰণৰ মহোৎসৱে নিশ্চিতভাৱে সৰু সৰু সম্প্ৰদায়বোৰক তেওঁলোকৰ লুকাই থকা প্ৰতিভাৰ প্ৰদৰ্শনেৰে আগবাঢ়ি অহাত সহায় কৰিব,’’-তেওঁ কয়।

প্ৰেশ্ব’ৱে কয় যে বহুতো প্ৰতিভাসম্পন্ন যুৱ শিল্পীয়ে এই মহোৎসৱৰ সুবিধা গ্ৰহণ কৰিব পাৰে আৰু পৰিচালক তথা ছবি নিৰ্মাতাসকলে তেওঁলোকৰ ছবিৰ জৰিয়তে দিব খোজা বাৰ্তাসমূহক লৈ জনসাধাৰণক অনুপ্ৰাণিত কৰি তথা শিক্ষিত কৰি এখন শক্তিশালী সমাজ গঢ়াত সহায় কৰিব পাৰে। ‘’ আমাৰ এক চহকী সংস্কৃতি তথা লোক কলা আছে আছে যদিও সেইবোৰ এতিয়াও উলিয়াই আনিব পৰা নাই কিম্বা সংৰক্ষণ কৰিব পৰা নাই।