প্ৰশাসনৰ নিষেধাজ্ঞাক অংগুষ্ঠ দেখুৱাই শিলচৰত মুকলিকৈ বিক্ৰী চালানী মাছ

বিষাক্ত ফৰ্মেলিনযুক্ত চালানী মাছ বিক্ৰীৰ বাবে ৰাজ্য চৰকাৰে নিষেধাজ্ঞা জাৰি কৰাৰ পাছতো এই নিৰ্দেশনাক কেৰেপ কৰা নাই অসাধু ব্যৱসায়ীসকলে।

ইয়াৰ পৰিণতিতে আজি দ্বিতীয় দিনাও ৰাজ্যৰ ভিন্ন প্ৰান্তৰ লগতে শিলচৰৰ ফাটক বজাৰত মুকলিকৈ বিক্ৰী হৈ আছে চালানী মাছ।

এই সন্দৰ্ভত এজন মাছ বিক্ৰেতাই প্ৰতিক্ৰিয়া ব্যক্ত কৰি কয়— আমি কি কৰিম? আমাৰ তাত এতিয়াও বহু মাছ আছে। যদিহে আমি সেয়া বিক্ৰী নকৰো তেন্তে আমি বৃহৎ লোকচান ভৰিব লাগিব। আন এগৰাকী মাছ বিক্ৰেতা দুৰ্গাচৰণ দাসে চৰকাৰৰ সিদ্ধান্তক আদৰণি জনাইও কয় যে এই সিদ্ধান্তৰ ফলত বিক্ৰেতাসকলে ব্যাপক ক্ষতিৰ সন্মুখীন হ’ব লাগিব।

আনহাতে শিলচৰৰ পাইকাৰী মাছ বজাৰ সমিতিৰ সম্পাদক ভাস্কৰ দাসেও নিজৰ প্ৰতিক্ৰিয়া প্ৰকাশ কৰি চালানী মাছ বন্ধক বিমুদ্ৰাকৰণৰ সৈতে ৰিজাই। তেওঁ চৰকাৰে চালানী মাছ নিষিদ্ধ কৰাৰ ৭ দিন পূৰ্বে জাননী কিয় দিয়া নহ’ল বুলিও প্ৰশ্ন উত্থাপন কৰে।

উল্লেখযোগ্য যে বিগত প্ৰায় ৩০- ৪০ বছৰ ধৰি অন্ধ্ৰপ্ৰদেশৰ উপৰি দক্ষিণৰ অন্যান্য ৰাজ্যৰ পৰাও অসমলৈ চালানী মাছ আমদানি কৰা হৈ আছে। কিন্তু শেহতীয়াভাৱে ৰাজ্য চৰকাৰে চালানী মাছত নিষিদ্ধ ফৰ্মেলিনৰ নমুনা ধৰা পোলোৱাৰ পাছত গ্ৰহণ কৰা সিদ্ধান্তক লৈ এতিয়া চৰম অস্বস্তিত পৰিছে মাছ বিক্ৰেতাসকল।