কোকৰাঝাৰত পিষ্টলসহ আটক দুজন কেএলঅ’ সদস্য

কোকৰাঝাৰ জিলাৰ ছালাকাটি উপ-আৰক্ষীৰ অন্তৰ্গত শিলকাটাৰীত সেনা আৰু আৰক্ষীয়ে চলোৱা এক যৌথ অভিযানত দেওবাৰে দুজনকৈ কেএলঅ’ৰ সদস্যক আটক কৰিবলৈ সক্ষম হয়।

ধৃত সদস্য দুজন ক্ৰমে ২ নং চৌটাকীৰ কৃষ্ণ বৰ্মণ ওৰফে মনোজ কোচ(১৯) আৰু সম্বাৰু বৰ্মন ওৰফে খুদু(২০) বুলি আৰক্ষীয়ে জানিবলৈ দিয়ে।

উল্লেখ্য যে দুয়োগৰাকী ধৃত কেএলঅ’ সদস্যই ২০১৬ চনত বাংলাদেশত সামৰিক প্ৰশিক্ষণ গ্ৰহণ কৰি আহিছিল। বাংলাদেশৰ পৰা আহিয়ই তেওঁলোকে কোকৰাঝাৰ জিলাৰ ছেৰফাংগুৰিৰ লগতে বিভিন্ন অঞ্চলত নতুন সদস্য সংগঠনটোত ভৰ্তী কৰোৱাৰ উপৰি অঞ্চলটোত ধন দাবী কাৰ্যত জড়িত আছিল।

আৰক্ষীৰ দলটোৱে দুৰ্ধৰ্ষ সদস্য দুজনৰ পৰা দেশত নিৰ্মিত দুটা পিষ্টল আৰু চাৰিটা ৰাউণ্ড সক্ৰিয় গুলীৰ লগতে বহুতো আপত্তিজনক নথি পত্ৰ সংগ্ৰহ কৰিবলৈ সক্ষম হয়। ইফালে জানিব পৰা মতে আৰক্ষীয়ে দুয়োজনকে অধিক তথ্যৰ বাবে মাৰাথন জেৰা অ্যাহত ৰাখিছে।