গুৱাহাটীত সক্ৰিয় আলফা (স্বাধীন); ধন নিবলৈ আহি আটক এজন

আৰক্ষী, ভি ভি আই পিয়ে টিঘিল-ঘিলাই থকা গুৱাহাটী মহানগৰটো সক্ৰিয় হৈ আছে আলফা (স্বাধীন)। বিদ্ৰোহী সংগঠনটোৰ গণভিত্তি শেহতীয়াকৈ বৃদ্ধি পোৱা বুলি বিভিন্ন মহলে কৰি অহা দাবীক অধিক ভিত্তিপ্ৰদান কৰি মঙলবাৰে খোদ ৰাজধানী দিছপুৰতে গ্ৰেপ্তাৰ হ’ল ধন সংগ্ৰহ কৰিবলৈ যোৱা এজন আলফা (স্বাঃ)ৰ লিংক মেন।

দিচপুৰৰ জি এন আৰ চি চিকিৎসালয়ৰ সমীপৰ পৰা ভৰলু আৰক্ষীয়ে ১ লাখ টকাসহ আটক কৰে নিপন দাস নামৰ বকোৰ এই ৩৬ বছৰীয়া লিংক মেনজনক।

‘ধুবুৰীৰ এজন ব্যৱসায়ীক নিপন দাসে কেইদিনমান আগতে ফ’নযোগে ১০ লাখ টকা দাবী কৰিছিল। পিছত তেওঁ ১ লাখত মান্তি হয়,’ আলফা (স্বাঃ) লিংক মেনজনক আটক কৰাৰ পিছত মন্তব্য ভৰলুমুখ আৰক্ষী থানাৰ ভাৰ্প্ৰাপ্ত বিষয়া মণিকান্ত চমুৱাৰ।

ধৃত দাসে ধন নিবলৈ আহি কেইবাবাৰো ঠাই সলনি কৰা বুলি উল্লেখ কৰি আৰক্ষী বিষয়াজনে কয় যে পিছত তেওঁক দিচপুৰৰ পৰা আটক কৰা হয়।

দাসে পূৰ্বে দুলীয়াজানত এবাৰ আত্মসমৰ্পণ কৰিছিল। ২০১৭ চনত তেওঁক পশ্চিম গাৰো পাহাৰত ধন দাবীৰ অভিযোগত গ্ৰেপ্তাৰ কৰা হৈছিল বুলিও আৰক্ষীয়ে দাবী কৰিছে।

জিলা আৰু সত্ৰ আদালতত বুধবাৰে হাজিৰ কৰোৱাৰ পিছত দাসক আৰক্ষীয়ে চাৰিদিনৰ বাবে জিম্মাত পাইছে।