ব্ৰহ্মপুত্ৰৰ গৰাখহনীয়াই ভয়ংকৰ ৰূপ ধাৰণ কৰিছে মাজুলীৰ মিছামাৰীত

ব্ৰহ্মপুত্ৰৰ প্ৰৱাল গৰাখহনীয়াৰ ফলত প্ৰায় নিঃশেষ হ’বলৈ ধৰিছে পৃথিৱীৰ বৃহত্তম নদীদ্বীপ মাজুলীৰ ১নং মিছামৰা অঞ্চল। বছৰটোৰ দ্বিতীয়টো বানৰ পাছতে এতিয়া মাজুলীৰ ১নং মিছামৰা অঞ্চলৰ বাসিন্দাসকলে নিজৰ ভেটি-মাটি হেৰুওৱাৰ আশংকাত কটাবলগীয়া হৈছে দিন-ৰাতি।

এই পৰ্যন্ত মাজুলীৰ উক্ত অঞ্চলটোত বাস কৰা ৮৪টা পৰিয়ালৰ প্ৰায় আধা সংখ্যকে খহনীয়াৰ কবলত পৰাৰ বাবে নিজৰ আপোন ঘৰ এৰি নিলগত বাহৰ পাতিছে । ব্ৰহ্মপুত্ৰই এফালৰ পৰা গ্ৰাস কৰিছে অঞ্চলটোৰ ঘৰ-মাটি, ভেটি, কৃষি পথাৰ।

উল্লেখ্য যে ব্ৰহ্মপুত্ৰ নদীৰ এনে ভয়ংকৰ গৰাখহনীয়াৰ বাবেই ২৪ জুলাইত নদীৰ পাৰত খেলি থকা এটি  শিশু নদীত পৰি মৃত্যু হোৱাৰ ঘটনাও সংঘটিত হৈছিল। কিন্তু ইয়াৰ পাছতো নীৰৱ ভূমিকা অৱলম্বন কৰি আছে চৰকাৰ কিম্বা প্ৰশাসন।

ইফালে মাজুলীৰ ভৌগলিক সুৰক্ষাৰ দায়িত্ব লোৱা ব্ৰহ্মপুত্ৰ বৰ্ডক শেষতীয়াকৈ মাজুলীৰ গৰাখহনীয়া প্ৰতিৰোধৰ বাবে ২৩৭ কোটি টকা মোকলাই দিয়াৰ পাছতো কিয় অঞ্চলটোত এইপৰ্যন্ত বিভাগীয় কৰ্তৃপক্ষই সুৰক্ষাৰ কোনো ব্যৱস্থা গ্ৰহণ কৰা নাই তাক লৈ প্ৰশ্ন উত্থাপন কৰিছে ভুক্তভোগী ৰাইজে।

প্ৰশাসন তথা বিভাগীয় কৰ্তৃপক্ষৰ চৰম অৱহেলাৰ বাবেই বছৰ বছৰ ধৰি মাজুলীৰ অধিকাংশ অঞ্চলৰ লোকে এনেদৰে দুৰ্বিষহ জীৱন অতিবাহিত কৰি আহিবলগীয়া হোৱা ঘটনাই স্বাভাৱিকতে সচেতন মহলৰ মাজত অবুজ প্ৰশ্নৰ উদয় হৈছে।