পাহাৰৰ বড়ো-কছাৰীসকলক অনুসূচিত জনজাতিৰ মৰ্যাদা প্ৰদানৰ আশ্বাস কেন্দ্ৰৰ

কাৰ্বি আংলং আৰু উত্তৰ কাছাৰ পাৰ্বত্য জিলাত থকা বড়ো আৰু মেছ কছাৰীসকলে শীঘ্ৰে অনুসূচিত জনজাতিৰ স্বীকৃতি লাভ কৰিব বুলি কেন্দ্ৰীয় জনজাতি পৰিক্ৰমা মন্ত্ৰী জুৱেল ওৰামে প্ৰতিশ্ৰুতি প্ৰদান কৰিছে। কেন্দ্ৰীয় মন্ত্ৰীগৰাকীয়ে মঙলবাৰে মন্ত্ৰী চন্দন ব্ৰহ্ম আৰু সাংসদ বিশ্বজিৎ দৈমাৰীৰ আগত এই আশ্বাস প্ৰদান কৰে।

উল্লেখ্য যে প্ৰধান মন্ত্ৰী নৰেন্দ্ৰ মোদী নেতৃত্বাধীন কেবিনেট কমিটিয়ে বহু দিন আগতেই পাহাৰত থকা বড়ো-কছাৰীসহ দেশৰ কেইবাটাও জনগোষ্ঠীৰ জনজাতিকৰণৰ প্ৰস্তাৱত অনুমোদন জনাই থৈছিল।

সংসদৰ মজিয়াত ২০১৬ চনৰ ডিচেম্বৰত এই সম্পৰ্কত এখন বিধেয়কো উত্থাপন কৰা হৈছিল। পিছে এখন ৰাজ্যৰ জনগোষ্ঠীক লৈ দেখা দিয়া সমস্যাৰ বাবে এতিয়া পাহাৰৰ বড়ো-কছাৰীসকলৰ বাবে এখন সুকীয়াকৈ বিধেয়ক প্ৰস্তুত কৰি থকা বুলি কেন্দ্ৰীয় মন্ত্ৰী ওৰামে জানিবলৈ দিয়ে।

ইফালে ওৰামে অসমৰ দুয়োগৰাকী নেতাৰ আগতে প্ৰতিশ্ৰুতি দি কয় যে সংসদৰ আগন্তুক অধিৱেশনত বিধেয়কখন গৃহীত কৰা হ’ব।

উল্লেখযোগ্য যে ২০১৬ চনৰ অসম বিধানসভা নিৰ্বাচনৰ প্ৰাকমুহূৰ্তত প্ৰধান মন্ত্ৰী নৰেন্দ্ৰ মোদীয়ে কোকৰাঝাৰৰ এখন জনসভাত অংশ লৈ পাহাৰত বাস কৰা বড়ো-কছাৰীসকলক জনজাতিৰ স্বীকৃতি প্ৰদান কৰিব বুলি প্ৰতিশ্ৰুতি প্ৰদান কৰিছিল।

উল্লেখ্য, উত্তৰ কাছাৰ পাৰ্বত্য জিলা আৰু কাৰ্বি আংলঙত প্ৰায় ৩৫ হাজাৰ বড়ো-কছাৰী লোকে বসবাস কৰে।