কলেজ ৰ’ডৰ পথ মেৰামতিৰ দাবীত ছাত্ৰ-ছাত্ৰীৰ পথ অৱৰোধ

হাফলং চৰকাৰী কলেজলৈ অহাযোৱা কৰাৰ মূল পথটোৰ শোচনীয় হৈ পৰা সত্ত্বেও কাণসাৰ নাই চৰকাৰৰ। পথটোৰ মেৰামতিৰ কাম আৰম্ভ কৰিছিল যদিও সংশ্লিষ্ট কৰ্তৃপক্ষই অলপ কাম কৰিয়ে তাক আধা কৰা অৱস্থাত পেলাই থয়। যিখিনি কাম হৈছে সেইখিনিৰো মান অতি নিম্ন। ফলত মেৰামতিৰ এক মাহৰ অন্তত পথটো পূৰ্বৰ অৱস্থা পায়।

আনহাতে হাফলং জনস্বাস্থ্য কাৰিকৰী বিভাগৰ হেমাহিৰ কাৰণে পথটোৰ ওপৰত পানী যোগান ধৰা পাইপ লাইনৰ পানী ওলাই থাকে আৰু যিকোনো সময়ত বোকাময় হৈ থাকে।

অতিষ্ঠ হৈ পৰা ছাত্ৰ-ছাত্ৰীসকলে আজি দিনৰ এঘাৰ বজাৰ পৰা পথ অৱৰোধ কাৰ্যসূচী হাতত লৈছে। হাফলং চৰকাৰী কলেজ ছাত্ৰ সংস্থাই কলেজ ৰ’ডৰ প্ৰৱেশ পথত বাঁহেৰে বেৰিকেইড স্থাপন কৰি চৰকাৰৰ বিৰুদ্ধে প্ৰতিবাদ সাব্যস্ত কৰে। প্ৰতিবাদকাৰী ছাত্ৰ-ছাত্ৰীসকলে পথটোৰ শীঘ্ৰেই মেৰামতিৰ লগতে জনস্বাস্থ্য কাৰিকৰী বিভাগৰ পানী যোগান ধৰা পাইপ লাইন সঠিকভাৱে স্থাপনৰ দাবী জনায়।

প্ৰতিবাদ কৰা ছাত্ৰ-ছাত্ৰীসকলৰ অভিযোগ যে চহৰখনৰ অন্যতম উচ্চ শিক্ষা প্ৰতিষ্ঠান হাফলং চৰকাৰী কলেজৰ পথ মেৰামতিৰ কাৰণে দীৰ্ঘ দিনৰ পৰা তেওঁলোকে দাবী জনাই আহিছে যদিও পাৰ্বত্য স্বায়ত্ত পৰিষদ তথা হাফলং টাউন কমিটীয়ে গুৰুত্ব দিয়া নাই।

চহৰৰ মাজমজিয়াত অবস্থিত চৰকাৰী কলেজ এখনৰে বাটপথৰ মেৰামতিৰ কাৰণে ছাত্ৰ-ছাত্ৰীয়ে ৰাজপথলৈ আহি প্ৰতিবাদ কৰিব লগীয়া হোৱাটো দুৰ্ভাগ্যজনক বুলি আখ্যা দিছে স্থানীয় ৰাইজে।

এগৰাকী ছাত্ৰীৰ অভিযোগ যে যোৱা দুই বছৰ আগতে পথটো মেৰামতিৰ নামত এগৰাকী ঠিকাদাৰে মানুহক দেখুৱাই শিলগুটি পেলাইছিল যদিও আধাতে কাম সামৰি কোনো খা-খবৰ নকৰা হয়।

আনহাতে জনস্বাস্থ্য কাৰিকৰী বিভাগৰ পাইপ লাইনে পথটোৰ অবস্থা অধিক বেয়া কৰিছে। অভিযোগমতে, বিভাগৰ দ্বাৰা অবৈধভাৱে পাইপ লাইনৰ সংযোগ দিয়া কাৰণে পানী লিকেইজ হৈ পথৰ ক্ষতি সাধন কৰে।

ইতিমধ্যে উত্তৰ কাছাৰ পাৰ্বত্য স্বায়ত্তশাসিত পৰিষদৰ অধ্যক্ষা ৰাণু লাংথাছা আৰু হাফলং টাউন কমিটীৰ চেয়াৰমেন অনিল দাউলাগুপু অৱৰোধস্থলীত উপস্থিত হৈছে যদিও অৱৰোধ অব্যাহত আছে।