ডিমা হাচাও সীমান্তৱৰ্তী বান্দৰখালত ট্ৰিপাৰ চালকৰ প্ৰতিবাদ; ধনৰ বাবে ৰখাই থয় বৈধ টি পি থকা ট্ৰাক

ডিমা হাচাও জিলাৰ পৰা বৈধ নথিৰে শিলগুটি কঢ়িয়াই নিয়া ট্ৰিপাৰ বন বিভাগে অন্যায়ভাৱে ৰখাই থোৱা ঘটনাক কেন্দ্ৰ কৰি ডিমা হাচাও-কাছাৰ জিলা সীমান্তৱৰ্তী বান্দৰখালত যোৱা দুদিন ধৰি ট্ৰিপাৰ চালক আৰু মালিকসকলৰ মাজত মিশ্ৰ প্ৰতিক্ৰিয়া দেখা গৈছে।

অভিযোগমতে, শিলগুটি কঢ়িয়াই নিয়া ট্ৰিপাৰৰ বৈধ ট্ৰানজিট পাছ, পাৰ্মিট আদি থকাৰ পাছতো বিভিন্ন অজুহাতেৰে শিলগুটিভৰ্তি প্ৰায় অৰ্ধ শতাধিক ট্ৰিপাৰ বন বিভাগে ৰখাই থোৱা কাৰ্যৰ আঁৰত কাছাৰ বন বিভাগৰ ডি এফ অ’কে ধৰি উদাৰবন্দৰ আঞ্চলিক বন বিষয়া জড়িত থকাৰ সম্ভাৱনা আছে।

অভিযোগাকীৰ চালক-মালিকপক্ষৰ মতে, পৰোক্ষভাৱে এনে বৈধ ট্ৰিপাৰ ৰখাই নিজৰ পকেট গৰম কৰা অনৈতিক পন্থা অৱলম্বন কৰিছে বন বিভাগে। অকল বন বিষয়াই নহয়, মন্ত্ৰী পৰিমল শুক্লবৈদ্যই বনমন্ত্ৰীৰ দায়িত্ব লাভ কৰাৰ পাছতে এটাৰ পাছত আনটো সমস্যাৰ সৃষ্টি হৈছে বুলি আজি বান্দৰখালত অভিযোগ কৰে এগৰাকী ট্ৰিপাৰ চালকে।

ট্ৰিপাৰ চালকসকলে অভিযোগ কৰে যে হাৰাংগাজাও বা ডিমা হাচাওত কোনো ধৰণৰ সমস্যা নাই। কিন্তু কাছাৰ সীমান্তত সোমোৱাৰ লগে লগে বন বিষয়াৰ পৰা আৰক্ষী বিষয়া যাকে-তাকে পইচা দিব লগা হয়। কিন্তু চালকসকলৰ বৈধ টি পিৰ উপৰি বন বিভাগৰ ছীল স্বাক্ষৰ থকা পাৰ্মিট আছে। চালকসকলৰ অভিযোগ যে মন্ত্ৰী পৰিমল শুক্লবৈদ্যই  বন মন্ত্ৰীৰ দায়িত্ব চমজি লোৱাৰ পাছত দুৰ্নীতিৰ মাত্ৰা বৃদ্ধি পাইছে। ফলত এনে দুৰ্নীতি যদি চলি থাকে তেতিয়া হ’লে শ্ৰমিকসকল জীয়াই থকাটো কঠিন হৈ পৰিব।

শিলগুটি যোগান ধৰা এগৰাকী হাৰাংগাজাওৰ স্থানীয় যুৱকে অভিযোগ কৰে যে হাৰাংগাজাও বা ডিটকচড়াৰ জাতিংগা নৈৰ পৰা শিলগুটি নি ত্ৰিপুৰা, মিজোৰাম আৰু বৰাক উপত্যকাত যোগান ধৰাৰ কাৰণে উত্তৰ কাছাৰ পাৰ্বত্য স্বায়ত্তশাসিত পৰিষদৰ বন বিভাগৰ বৈধ অনুজ্ঞাপত্ৰ আছে। অথচ কাছাৰ বন বিভাগে ডিমা হাচাও অতিক্ৰম কৰাৰ লগে লগে বিশেষকৈ বান্দৰখাল ফৰেষ্ট চেক গেইটৰ পৰা বালাচৰা বীট অফিচ বিষয়াৰ শিলগুটিভৰ্তি ট্ৰিপাৰ ৰখাই বিভিন্ন উপায়েৰে হাৰাশাস্তি কৰি আহিছে। তেওঁলোক পৰোক্ষ দাবী হ’ল পইচা দিব লাগে। অন্যথা ট্ৰিপাৰ যাবলৈ নিদিয়ে।

ট্ৰিপাৰ চালকৰ মতে তেওঁলোকে সদায় ট্ৰিপাৰ এণ্ট্ৰি কৰাৰ নামত ফৰেষ্ট চেক গে’ট বা বীট অফিচত এশৰ পৰা দুশ টকা দি যায়। লগতে আৰক্ষীক দিয়া হয়। কিন্তু ইয়াৰ পাছতো এতিয়া টি পিৰ নম্বৰ আদি চেক কৰাৰ নামত দিনৰ পাছত দিন ট্ৰিপাৰ ৰখাই থয়। এনে হৰাশাস্তি মানি লোৱা নহ’ব।