নুমলীগড়ৰ মৰঙীত বনৰীয়া হাতীৰ জাকে তহিলং কৰিলে বহু বিঘা ধাননি

সম্প্ৰতি ৰাজ্যত ক্ৰমান্বয়ে বৃদ্ধি পাইছে হাতী-মানুহৰ সংঘাত। গোলাঘাট জিলাৰ নুমলীগড়ৰ মৰঙী অঞ্চলত বনৰীয়া হাতীৰ সন্ত্ৰাসত স্থানীয় ৰাইজে নিশা বিনিদ্ৰ ৰজনী কটাব লগীয়া হয়।

প্ৰাপ্ত তথ্য মতে নুমলীগড়ৰ মৰঙী অঞ্চলৰ বহু গাঁৱত নিশা হোৱা মাত্ৰকে বনৰীয়া হাতীয়ে তাণ্ডৱ চলাই আহিছে। কালিও নিশা হোৱাৰ লগে লগে ৬০-৭০টা হাতীৰ এটা জাকে উক্ত অঞ্চলত প্ৰৱেশ কৰি উপদ্ৰৱ চলায়।

নিশাৰ পৰা পুৱালৈ উপদ্ৰৱ অব্যাহত ৰখা হাতীৰ জাকটোৱে অঞ্চলটোৰ বহু পৰিয়ালৰ বহু বিঘা ধাননি খাই-গছকি তহিলং কৰা বুলি জানিব পৰা গৈছে।

শেহতীয়াকৈ আমালৈ অহা খবৰ অনুসৰি হাতীৰ জাকটো বৰ্তমান উক্ত অঞ্চলৰে এখন চাহ বাগিচাত আশ্ৰয় লৈ আছে।

উল্লেখযোগ্য যে বনৰীয়া হাতীৰ তাণ্ডৱে অঞ্চলটোৰ স্থানীয় ৰাইজক জ্বলা-কলা খুৱাইছে যদিও কোনো ধৰণৰ গুৰুত্ব প্ৰদান কৰা নাই ৰাজ্য চৰকাৰ তথা বন বিভাগে। এই অভিযোগ উত্থাপন কৰিছে অঞ্চলটোৰ স্থানীয় ৰাইজে। বন বিভাগক স্থানীয় ৰাইজে হাতীৰ তাণ্ডৱৰ বিষয়ে অৱগত কৰিছে যদিও আজিলৈকে এই ক্ষেত্ৰত কোনো ধৰণৰ গুৰুত্ব প্ৰদান কৰা নাই বন বিভাগে।

ফলত অতি শীঘ্ৰে এই ক্ষেত্ৰত বিহিত ব্যৱস্থা কৰি বন বিভাগক উচিত পদক্ষেপ গ্ৰহণ কৰিবলৈ দাবী জনাইছে।