ছিকিমত চাৰিদিনীয়া কাৰ্যসূচীৰে আৰম্ভ হৈছে ‘নৃত্যোৎসৱ’

শনিবাৰে গেংটকত চাৰিদিনীয়া কাৰ্যসূচীৰে আৰম্ভ হৈছে ‘নৃত্যোৎসৱ’ শীৰ্ষক নৃত্যৰ উৎসৱ। ৰাজ্যপাল শ্ৰীনিবাস পাটিলে মনন কেন্দ্ৰ প্ৰেক্ষাগৃহত অনুষ্ঠিত এই উৎসৱ উদ্বোধন কৰে। দেশৰ প্ৰখ্যাত নৃত্যবিদে এই উৎসৱত দৰ্শকক মুগ্ধ কৰিব।

এই উৎসৱৰ আয়োজন কৰিছে ছিকিমৰ সাংস্কৃতিক পৰিক্ৰমা তথা ঐতিহ্য বিভাগৰ সহযোগত নতুন দিল্লীৰ সংগীত নাটক একাডেমী, নেশ্যনেল একাডেমী অফ মিউজিক আৰু ড্যান্স এণ্ড ড্ৰামায়।

এন ই নাওৰ সৈতে হোৱা বাৰ্তালাপত সংগীত নাটক একাডেমীৰ নৃত্য শাখাৰ মুৰব্বী হেলেন আচাৰ্যই কয় যে সন্মানীয় ওস্তাদ বিছমিল্লাহ খাঁ যুৱ পুৰস্কাৰ লাভ কৰা ৰাষ্ট্ৰীয় পৰ্যায়ৰ নৃত্যবিদে উৎসৱত প্ৰদৰ্শন আগবঢ়াব। সকলো শিল্পীয়ে তেওঁলোকৰ নিজস্ব সংগীত শিল্পীৰ দল লগত আনিব আৰু ‘লাইভ’ সংগীত তথা অৰ্কেষ্ট্ৰাৰ সৈতে প্ৰদৰ্শন আগবঢ়াব।

এই উৎসৱত প্ৰদৰ্শন আগবঢ়াব চেন্নাইৰ উমা সথ্যানাৰায়ননে ভৰতনাট্যম, গুৱাহাটীৰ মৃদুস্মিতা দাস আৰু সেউজপ্ৰিয়া বৰঠাকুৰে সত্ৰীয়া, ছেৰাইকেলাৰ সতীশ কুমাৰ মোদকে চাও, ইম্ফলৰ ছিজাগুৰুমায়ুমৰ নমিতা দেবী আৰু পি বিলাস সিঙে মণিপুৰী, উদইপুৰৰ ববী চক্ৰৱৰ্তীয়ে কুচিপুডি, পালাক্কাডৰ কলামণ্ডলমৰ প্ৰদীপ কুমাৰে কথাকলি, ভুৱেনশ্বৰৰ লিংগৰাজ প্ৰধানে ওডিছি, দিল্লীৰ মনিষা নায়ক আৰু গৌৰী দিৱাকৰে কথক আৰু ত্ৰিছুৰৰ সংগীথ চাক্যৰে কুটিয়াট্টম।

আচাৰ্যই কয় যে দেশৰ আগশাৰীৰ নৃত্যবিদে অংশগ্ৰহণ কৰিবলগীয়া নৃত্যৰ এই উৎসৱ ছিকিমত প্ৰথমবাৰৰ বাবে অনুষ্ঠিত হৈছে। সংগীত নাটক একাডেমীয়ে সদায়ে ছিকিমৰ স্থানীয় শিল্পী তথা শিল্পীদলসমূহক আগবঢ়াই নিবলৈ সাজু বুলিও আচাৰ্যই মত প্ৰকাশ কৰে।