বিজেপিত খহনীয়া : মাৰ্ঘেৰিটাত শতাধিক বিজেপি কৰ্মীৰ কংগ্ৰেছত যোগদান

পঞ্চায়ত নিৰ্বাচনৰ দিন ঘোষণা কৰাৰ পাছত ৰাজ্যৰ বিভিন্ন বিধান সভা সমষ্টিৰ দৰে ১২৪ নং মাৰ্ঘেৰিটা বিধান সভা সমষ্টিটো শাসনাধিষ্ঠ বিজেপি আৰু কংগ্ৰেছ দলৰ নেতা কৰ্মী সমৰ্থক আৰু প্ৰাৰ্থীত্ব প্ৰত্যাশীৰ   মাজত নিৰ্বাচনকেন্দ্ৰিক তৎপৰতা আৰম্ভ হৈছে।  সমষ্টিৰ ১৮ খন  গাওঁ পঞ্চায়তত একাধিক প্ৰাৰ্থীত্বৰ দাবীদাৰে দুয়োটা দলৰে শীৰ্ষ নেতৃত্বক চিন্তিত কৰি তুলিছে।

সমষ্টিত সৰহখনি সময় অতিবাহিত কৰি বিধায়ক ভাস্কৰ শৰ্মাই পঞ্চায়ত দখলৰ তৎপৰতা অৱ্যাহত ৰাখিছে। ইয়াৰ বিপৰীতে কালি সমষ্টিটোত প্ৰাক্তন মন্ত্ৰী তথা কংগ্ৰেছ দলৰ ৰাষ্ট্ৰীয় সম্পাদক প্ৰদ্যুৎ বৰদলৈ  উপস্থিত হোৱাৰ পাছতে কংগ্ৰেছ দলৰ শিবিৰত তৎপৰতা বৃদ্ধি পাইছে।

আজি  বিজেপিৰ  পুৰণি পুখুৰী মণ্ডল যুৱ মৰ্চাৰ সাধাৰণ সম্পাদক দিলীপ মৰাণৰ নেতৃত্ব পুৰণি পুখুৰী মণ্ডলৰ  প্ৰায় শতাধিক বিজেপি কৰ্মীয়েআজি কংগ্ৰেছ দলৰ ৰাষ্ট্রীয় সম্পাদক  প্ৰদ্যুৎ বৰদলৈৰ উপস্থিতিত মাৰ্ঘেৰিটা কংগ্ৰেছ ভৱনত যোগদান কৰে।

পঞ্চায়ত নিৰ্বাচনৰ প্ৰাকক্ষণত গেৰুৱা দলটোৰ মাজত সৃষ্টি হোৱা গৰাখহনীয়া তাৎপৰ্য পূৰ্ণ হিচাপে চিহ্নিত হৈছে। উল্লেখযোগ্য যে  বিজেপিৰ মাৰ্ঘেৰিটা সদৰ মণ্ডলৰ সভাপতি ভাদেশ্বৰ মৰাণৰ গৃহ পঞ্চায়ত হৈছে পুৰণি পুখুৰী । নিৰ্বাচনৰ দিন চমু চাপি অহাৰ লগে লগে দল বাগৰা ৰাজনীতি বৃদ্ধি পোৱাটো পৰিলক্ষিত হৈছে।পঞ্চায়ত নিৰ্বাচনৰ প্ৰাকক্ষণত বিজেপিত গৰাখহনীয়া হোৱাটো পৰিলক্ষিত হৈছে।