আগছুৰ প্ৰতিনিধি দলে সাক্ষাত কৰিলে ৰাজ্যপাল জগদীশ মুখীক

সদৌ অসম গোৰ্খা ছাত্ৰ সন্থাৰ বিটিচি আঞ্চলিক কমিটিয়ে বিটিচিৰ ৬গৰাকী মনোনিত সদস্যক বিধান সভাত নিয়োজিত নকৰা বিষয়টোত গভীৰ উদ্বেগ প্ৰকাশ কৰি ৰাজ্যপালৰ হস্তক্ষেপ বিচাৰি সাক্ষাত কৰে। লক্ষ্যণীয় যে বিটিচি চৰকাৰখনে তিনিবছৰ কাল কটোৱাৰ পিছতো খালী হৈ থকা পদত মনোনিত ৬ গৰাকী সদস্যক আজি পৰ্যন্ত নিয়োজিত নকৰাত ক্ষুন্ন হৈ পৰিছে আগছুৰ নেতৃবৃন্দ।

আগছুৰ বিটিচি আঞ্চলিক কমিটিৰ তিনিজনীয়া প্ৰতিনিধি দল এটাই অসমৰ ৰাজ্যপাল জগদীশ মুখীক ৰাজভৱনত সাক্ষাত কৰি উপৰোক্ত বিষয়টো অৱগত কৰোৱায়। ইয়াৰ উপৰি প্ৰতিনিধি দলটোৱে বড়োলেণ্ডত বাস কৰা গোৰ্খা সম্প্ৰদায়ৰ লোক সকলৰ ভূমি পট্টা প্ৰদান কৰা আৰু বিটিচিত গোৰ্খা লোকৰ বাবে দুজন প্ৰাৰ্থীৰ বাবে আসন সংৰক্ষিত কৰাৰ দাবী তোলে ৰাজ্যপালগৰাকীৰ ওচৰত।

ৰাজ্যপালগৰাকীক সাক্ষাত কৰিবলৈ যোৱা দলটোত আগছুৰ উপদেষ্টা দিম্বেশ্বৰ উপাধ্যায়, সভাপতি জন চৌহান আৰু সাধাৰণ সম্পাদক ৰোহিত কুমাৰ দাহাল আছিল।

বিটিচিৰ যি সমূহ বিদ্যালয়ত ১৫ শতাংশতকৈ অধিক নেপালী ছাত্ৰ-ছাত্ৰীয়ে অধ্যয়ণ কৰি আছে সেই বিদ্যালয় সমূহত নেপালী ভাষী শিক্ষকৰ নিযুক্তি কৰাৰ বাবে ৰাজ্যপালৰ ওচৰত দাবী তোলে প্ৰতিনিধি দলটোৱে। এই কথা সংবাদ মাধ্যমৰ আগত প্ৰকাশ কৰে আগছু বিটিচি আঞ্চলিকৰ সাধাৰণ সম্পাদক ৰোহিত কুমাৰ দাহালে।