ঐতিহাসিক ডিমৌ পুখুৰী বেদখল মুক্ত কৰাৰ বাবে এমাহৰ সময়সীমা বান্ধি দিলে আটাছুৱে

স্বাধীনতাৰ ৭০ টা বছৰ অতিক্ৰম কৰাৰ পাছতো আজি পৰ্যন্ত ডিমৌৰ ঐতিহাসিক ডিমৌ পুখুৰী বেদখল অৱস্থাত আছে। আহোম ৰাজত্বৰ স্বাক্ষৰ বহন কৰা ঐতিহাসিক ডিমৌ পুখুৰীতো উদ্ধাৰৰ ক্ষেত্ৰত বিভিন্ন সময়ত ডিমৌ আঞ্চলিক তাই আহোম ছাত্র সন্থাৰ সমিতিয়ে দাবী জনাই অহাৰ পাছতো আজি পৰ্যন্ত প্ৰশাসনে পুখুৰীটো বেদখল মুক্ত কৰিব নোৱাৰিলে।

সোমাবাৰে তাই আহোম ছাত্র সন্থাই বিষয়টোৰ ওপৰত প্ৰতিক্ৰিয়া প্ৰকাশ কৰি সংবাদ মাধ্যমলৈ এক প্ৰেছ বিবৃতি প্ৰেৰণ কৰে।

বিবৃতিটোত উল্লেখ কৰা মতে বৰ্তমান ঐতিহাসিক ডিমৌ পুখুৰীৰ অৱশিষ্ট অংশসমূহ আজি অস্তিত্বৰ চূড়ান্ত সংকটত। ডিমৌবাসীৰ স্বাভিমান জড়িত থকা এনে এটা স্পৰ্শকাতৰ বিষয়ক লৈ প্ৰশাসনে আজি পৰ্যন্ত কেৱল মাত্ৰ টেবুলৰ আলোচনাত সীমাবদ্ধ হৈ থকাটো আটাছু ডিমৌ আঞ্চলিকে কোনো কাৰণতে সহজভাৱে ল’ব পৰা নাই।

এই ক্ষেত্ৰত ডিমৌ আঞ্চলিক তাই আহোম ছাত্র সন্থাই প্ৰশাসনৰ এনে ভূমিকাক তীব্ৰ ভাষাৰে গৰিহণা দিছে। লগতে ঐতিহাসিক ডিমৌ পুখুৰীতো উদ্ধাৰৰ বাবে আটাছুৱে প্ৰশাসনৰ লগতে বেদখলকাৰীক অন্তিমবাৰৰ বাবে সকীয়াই এক মাহৰ সময়সীমা নিৰ্দ্ধাৰণ কৰি দিয়ে।

অন্যথা ডিমৌ আঞ্চলিক তাই আহোম ছাত্র সন্থাই ডিমৌবাসীৰ সহযোগত কঠোৰভাৱে নিজাববীয়া ব্যৱস্থা গ্ৰহণ কৰি ডিমৌ পুখুৰীটো বেদখল মুক্ত কৰিবলৈ বাধ্য হ’ব বুলি প্ৰেছ বিবৃতিটোত উল্লেখ কৰে।