মহানগৰীৰ আজাৰাৰ ভৰালীপাৰাত মেধাবী ছাত্ৰৰ আত্মহত্যা

মহানগৰীত পুনৰ সংঘটিত আত্মহত্যাৰ ঘটনাই চাঞ্চল্যৰ সৃষ্টি কৰিছে। এইবাৰ আজাৰাৰ ভৰালীপাৰাত সংঘটিত হৈছে এটা আত্মহত্যাৰ ঘটনা।

ভৰালীপাৰাৰ এটা ভাড়াঘৰত আজি পুৱা ভাৰ্গৱ ভট্টাচাৰ্য নামৰ এজন ছাত্ৰৰ মৃতদেহ উদ্ধাৰ হৈছে। মৃত ছাত্ৰজনৰ ঘৰ বোকাখাতৰ নাহৰজানত বুলি জানিব পৰা গৈছে।

ছাত্ৰজন আজাৰাস্থিত গিৰিজানন্দ চৌধুৰী ইনষ্টিটিউট অব মেনেজমেণ্ট এণ্ড টেকনলজিত অধ্যয়ন কৰি আছিল আৰু তেওঁ লেটাৰেল এণ্ট্ৰিৰ  জৰিয়তে এইবাৰ প্ৰতিষ্ঠানটোত নামভৰ্তি কৰিছিল।

আজাৰা আৰক্ষী সূত্ৰই প্ৰকাশ কৰা মতে মৃত ভাৰ্গৱে দুজন বন্ধুৰ সৈতে ভৰালীপাৰাৰ ঘৰটোত ভাড়াতীয়া হিচাপে আছিল। ভাৰাঘৰটোৰ মালিকৰ নাম কল্যাণ বৰুৱা।

আৰক্ষীয়ে নৰ্থ ইষ্ট নাওক জনোৱা মতে তেওঁৰ বন্ধু দুজনে ‘ভাৰ্গৱে কালি নিশা প্ৰেয়সীৰ সৈতে কথা পাতি আছিল’ বুলি আৰক্ষীৰ আগত প্ৰকাশ কৰিছে। কিন্তু আজি পুৱা দুই বন্ধুৱে ছাত্ৰজনৰ মৃতদেহ দেখা পায়।

অৱশ্যে বৰ্তমানলৈকে ছাত্ৰজনৰ মৃত্যুৰ প্ৰকৃত কাৰণ জানিব পৰা হোৱা নাই। আৰক্ষীয়ে মৃতদেহটো ইতিমধ্যে মৰণোত্তৰ পৰীক্ষাৰ বাবে প্ৰেৰণ কৰিছে। লগতে ঘটনাৰ তদন্ত অব্যাহত ৰখা বুলি আৰক্ষীৰ সূত্ৰৰ পৰা জানিব পৰা গৈছে।

আনহাতে একাংশ সংবাদ মাধ্যমত এই সন্দৰ্ভত গিৰিজানন্দ চৌধুৰী ইনষ্টিটিউট অৱ মেনেজমেন্ট এণ্ড টেকনলজীৰ চৌহদত ছাত্ৰজনৰ মৃতদেহ উদ্ধাৰ হোৱা বুলি ভুলকৈ বাতৰি সম্প্ৰচাৰ হৈ আছে। প্ৰকৃততে আজাৰাৰ ভৰালীপাৰাৰ ভাড়াঘৰতহে ছাত্ৰজনৰ মৃতদেহ উদ্ধাৰ হয়।

উল্লেখযোগ্য যে জি আই এম টিলৈ অধ্যয়নৰ বাবে অহাৰ পূৰ্বে ছাত্ৰজনে নগাওঁ পলিটেকনিকত অধ্যয়ন কৰিছিল আৰু তাত তেওঁ ছাত্ৰ একতা সভাৰ সাধাৰণ সম্পাদক নিৰ্বাচিত হৈছিল।