মেঘদূত ভৱনৰ ছাদৰ ওপৰৰ পৰা পৰি এজন লোকৰ ৰহস্যজনক মৃত্যু

গুৱাহাটী মহানগৰীৰ পানবজাৰস্থিত মেঘদূত ভৱনৰ ছাদৰ ওপৰৰ পৰা পৰি আজি এজন লোকৰ ৰহস্যজনক মৃত্যু হোৱাক কেন্দ্ৰ কৰি চাঞ্চল্যৰ সৃষ্টি হৈছে।

উল্লেখযোগ্য যে আজি দুপৰীয়া ১:২০ বজাত সংঘটিত উক্ত ঘটনাটোত নিহত লোকজনক বাতৰি লিখা পৰলৈকে চিনাক্ত কৰিব পৰা হোৱা নাই।

প্ৰাপ্ত তথ্য মতে ঘটনাৰ খবৰ লাভ কৰি পানবজাৰ আৰক্ষী ঘটনাস্থলীত উপস্থিত হৈ মৃতদেহটোক মহেন্দ্ৰ মোহন চৌধুৰী চিকিৎসালয়লৈ লৈ যায় যদিও চিকিৎসালয়ত তেওঁক মৃত বুলি ঘোষণা কৰাৰ পিছতে লোকজনৰ মৃতদেহ মৰণোত্তৰ পৰীক্ষাৰ বাবে জি এম চি এইচলৈ প্ৰেৰণ কৰা হয়।

পানবজাৰ আৰক্ষীয়ে এয়া এক আত্মহত্যাৰ ঘটনা বুলি সন্দেহ কৰিছে যদিও মেঘদূত ভৱনত থকা একাংশ প্ৰত্যক্ষদৰ্শীয়ে লোকজনৰ মূৰ ঘূৰাই ওপৰৰ পৰা বুলি সন্দেহ কৰে।

এটা নীলা চুৱেটাৰ আৰু খাকী পেন্ট পৰিহিত নিহত লোকজনৰ বয়স প্ৰায় ৫০ বছৰ হ’ব বুলি অনুমান কৰা হৈছে। আনহাতে আৰক্ষীয়ে জনোৱা মতে মৃত ব্যক্তিজনৰ পকেটৰ পৰা কেৱল এটা ৫০০ টকীয়া নোটৰ বাহিৰে আন কোনো নথি-পত্ৰ উদ্ধাৰ হোৱা নাই।