নিৰ্বাচনমুখী ডিমা হাচাওত গুলীচালনাৰ ঘটনা; এজন চৰকাৰী বিষয়া আহত

উত্তৰ কাছাৰ পাৰ্বত্য স্বায়ত্ত শাসিত পৰিষদৰ নিৰ্বাচনৰ দিন চমু চাপি অহাৰ লগে লগে ক্ৰমাৎ উত্তপ্ত হৈ পৰিছে ডিমা হাচাও জিলাৰ আইন-শৃংখলাজনিত পৰিৱেশ।

মাইবাঙৰ ৱাজো গাঁৱৰ পৰা এগৰাকী বৃদ্ধাক অপহৰণ কৰা ঘটনাৰ ২৪ ঘণ্টা পাৰ নৌহওঁতেই আজি বিয়লি হাফলঙত খাদ্য আৰু অসামৰিক যোগান বিভাগৰ এগৰাকী বিষয়াক কাৰ্যালয়ৰ ভিতৰতে এজন দুৰ্বৃত্তই প্ৰৱেশ কৰি গুলীয়ায়।

ডিমা হাচাও জিলাৰ এৰিয়া অফিচাৰ হিচাপে কৰ্মৰত ৰূপম ওৰফে ডনাল্ড দিব্ৰাগেডে বিয়লি প্ৰায় ৪ বজাত কলেজ ৰ’ডস্থিত তেওঁৰ কাৰ্যালয়ত থকা অৱস্থাত অচিনাক্ত দুৰ্বৃত্তই তেওঁক লক্ষ্য কৰি দুজাঁইকৈ গুলী চলায়। দুৰ্বৃত্তৰ দুটাকৈ গুলীয়ে ৰূপমৰ বুকুত আঘাত কৰে। তেওঁক ততাতৈয়াকৈ হাফলং অসামৰিক চিকিৎসালয়ত ভৰ্তি কৰোৱা হয়।

ইপিনে গুলী চালনা কৰিয়ে দুৰ্বৃত্তই ঘটনাস্থলীৰ পৰা পলাই যায়। ঘটনাটোক লৈ হাফলং আৰক্ষীয়ে ইতিমধ্যে তদন্ত আৰম্ভ কৰিছে।

মন কৰিব লগীয়া যে ৰূপম ওৰফে ডনান্ড দিব্ৰাগেডে প্ৰায় এবছৰ আগতে হাফলঙৰ পৰা বদলি হৈ ডিফুত যোগদান কৰিছিল। কিন্তু পুনৰ ডিফুৰ পৰা বদলি হৈ হাফলঙত খাদ্য আৰু অসামৰিক যোগান বিভাগৰ ডিমা হাচাও জিলাৰ এৰিয়া অফিচাৰ হিচাপে নিযুক্ত হৈ আছিল।

আনহাতে, ডিমা হাচাও জিলাৰ আৰক্ষী অধীক্ষকে কয় যে এয়া কোনো উগ্ৰপন্থীৰ কাম নহয়, ব্যক্তিগত শত্ৰুতাৰ বাবেই এই আক্ৰমণ হ’ব পাৰে।