পঞ্চায়তত বিজেপিয়ে ভাল ফলাফল নাপায় : ভোটদান কৰি এই মন্তব্য অগপ সভাপতি অতুল বৰাৰ

বিগত বিধানসভা নিৰ্বাচনৰ সময়ত বোকাখাতৰ বাসিন্দা হোৱা অগপ সভাপতি অতুল বৰাই ম’হমাইকী গাঁও পঞ্চায়তৰ ৭৭ নম্বৰ জ্যোতি বিদ্যাপীঠ ভোট কেন্দ্ৰত আজি পুৱা ভোটদান কৰে। পুৱাতেই সাধাৰণ ভোটাৰৰ দৰে শাৰী পাতি অতুল বৰাই নিজৰ ভোটাধিকাৰ সাব্যস্ত কৰা পৰিলক্ষিত হয়।

ভোটদান কৰি সাংবাদিকৰ সৈতে হোৱা বাৰ্তালাপত বিজেপিয়ে বোকা চটিওৱাৰ ৰাজনীতি কৰাৰ অভিযোগ কৰে অগপৰ সভাপতিজনে। ‘বিজেপিয়ে অসমত প্ৰথমবাৰৰ বাবে পঞ্চায়তত অৱতীৰ্ণ হৈছে ৷ গতিকে বিজেপি দলে পঞ্চায়ত নিৰ্বাচনত কোনো পধ্যে ভাল ফলাফল কৰিব নোৱাৰে’। তেওঁ এইদৰে মন্তব্য কৰে।

বোকাখাতৰ পৰা নিৰ্বাচিত হৈ সৰ্বানন্দ সোণোৱাল চৰকাৰৰ কেবিনেট মন্ত্ৰী হোৱা অতুল বৰাৰ বাবে এইবাৰৰ পঞ্চায়ত নিৰ্বাচন এক প্ৰত্যাহ্বান স্বৰূপ। নিজৰ গৃহ সমষ্টিৰ ২০ খন পঞ্চায়ত দখল কৰিব পৰাতো অতুল বৰাৰ বাবে সন্মানৰো বিষয় হৈ পৰিছে ৷

উল্লেখ্য যে বোকাখাত মহকুমাত গাঁও পঞ্চায়তৰ নিৰ্বাচনত তিনিকোণীয়া প্ৰতিদ্বন্দ্বিতা স্পষ্ট হৈ পৰিছে। ইয়াৰ মাজতে অপৰাধী লোকক দলীয় প্ৰাৰ্থিত্ব প্ৰদান কৰি অসম গন পৰিষদ দলে সমষ্টিত সৰ্বসাধাৰণৰো সমালোচনাৰ সন্মুখীন হ’বলগীয়া হৈছে ৷ দলটোৰ এই কাৰ্যই পঞ্চায়ত নিৰ্বাচনত কেনে প্ৰভাৱ পেলাব সেয়া ১২ ডিচেম্বৰত স্পষ্ট হৈ পৰিব।

ইফালে এইবাৰৰ পঞ্চায়ত নিৰ্বাচনত বোকাখাতত মহকুমাত কোনো কোনো ৰাজনৈতিক দলে ভোট কিনাৰ বাবে মদ আৰু ব্যাপক হাৰত টকা ব্যৱহাৰ কৰা বুলি জনাইছে সাধাৰণ ৰাইজে।