আগৰতলালৈকে সম্প্ৰসাৰিত হ’ল কামাখ্যা-বাংগালুৰ হমচফৰ এক্সপ্ৰেছৰ সেৱা

আজি হমচফৰ এক্সপ্ৰেছে ত্ৰিপুৰা ৰাজধানীক বাংগালুৰৰ সৈতে সংযোগ কৰাৰ লগে লগে আগৰতলা হৈ পৰিল অত্যাধুনিক সা-সুবিধা সম্বলিত নতুনকৈ উদ্বোধন কৰা ৰেইলেৰে সংলগ্ন উত্তৰ পূৰ্বাঞ্চলৰ দ্বিতীয়খন মহানগৰ।

কামাখ্যা, হাওৰা, কটক আৰু বিজয়ৱাড়া হৈ দুই ৰাজ্যৰ ৰাজধানীক সংযুক্ত কৰা এই সাপ্তাহিক ৰেইলখনৰ পতাকা জোকাৰি শুভাৰম্ভ কৰে কেন্দ্ৰীয় ৰাজ্যিক ৰেইল মন্ত্ৰী ৰাজেন গোহাঁয়ে।

আজিৰ কাৰ্যসূচী আছিল কেৱল আনুষ্ঠানিকহে, আচলতে ৰেইলখনে ৰাইজক সেৱা আগবঢ়াব ৯ জানুৱাৰিৰ পৰাহে।

২০১৬ চনৰ ২৫ ডিচেম্বৰত কামাখ্যাৰ পৰা বাংগালুৰলৈ (৩০৩০ কি. মি.) এই ৰেইলখনৰ সেৱা আৰম্ভ হৈছিল। আজি ইয়াক আগৰতলালৈকে সম্প্ৰসাৰণ কৰা হ’ল।

উত্তৰ-পূব সীমান্ত ৰেইলৱেৰ সূত্ৰ অনুসৰি আগৰতলা আৰু গুৱাহাটীৰ মাজৰ ৭ টা আৰু আগৰতলা আৰু বাংগালুৰ কেণ্টনমেণ্ট ষ্টেচনৰ মাজৰ ২৬ টা ষ্টেচনত ৰেইলখন ৰ’ব। হমচফৰ এক্সপ্ৰেছে ৩ খলপীয়া সম্পূৰ্ণ শীত-তাপ নিয়ন্ত্ৰিত সেৱা আগবঢ়াব।

উল্লেখযোগ্য যে আগৰতলাৰ পৰা দক্ষিণে ১৩৫ কি. মি. দূৰত্বত অৱস্থিত দক্ষিণ ত্ৰিপুৰাৰ সীমামূৰীয়া চহৰ চাব্ৰুমলৈকে বৰ্তমান উত্তৰ-পূব সীমান্ত ৰেইলৱেই ইয়াৰ ৰেইল লাইন সম্প্ৰসাৰিত কৰিছে।