চাপানলাত খৰি বিচাৰিবলৈ গৈ ভালুকৰ আক্ৰমণত গুৰুতৰভাৱে আহত দুজন লোক

নগাঁও জিলাৰ শালনা আঞ্চলিক বন কাৰ্যালয়ৰ অধীনৰ চাপানলা খণ্ড বন কাৰ্যালয়ৰ অন্তৰ্গত জিয়াজুৰি চাহ বাগিচাত তিনিটা ভালুকৰ দলে দুজন লোকক আক্ৰমণ কৰি গুৰুতৰভাৱে আহত কৰা খবৰে সমগ্ৰ নগাঁও জিলাতে তীব্ৰ চাঞ্চল্যৰ সৃষ্টি কৰিছে।

জানিব পৰা মতে, দেওবাৰে আবেলি ভাগত জিৰাজুৰি চাহ বাগানৰ দুই নম্বৰ লাইনৰ নিবাসী টেলকো মুণ্ডাই (৪৮) তেওঁৰ পুত্ৰ  বিক্ৰম মুণ্ডাৰ  (১৫) সৈতে  জিৰাজুৰিস্থিত চোৱাং সংৰক্ষিত বনাঞ্চলখনৰ জিয়াজুৰি পাইপকোণা নামৰ পাহাৰ অঞ্চলত খৰি বিচাৰি গৈছিল।

পৰবৰ্তী সময়ত সংৰক্ষিত বনাঞ্চল খনত থকা এটা প্ৰাপ্ত বয়স্ক ভালুকসহ দুটা ভালুকৰ পোৱালিয়ে খৰি বিচাৰি যোৱা লোককেইজনৰ লগত মুখামুখি হোৱাত ভালুককেইটাই আক্ৰমণ কৰি লোককেইজনক গুৰুতৰভাৱে আহত কৰে।

ইয়াৰ পাছতে স্থানীয় লোকে ঘটনাটো গম পাই দুয়োকে উদ্ধাৰ কৰি নগাঁও অসামৰিক চিকিৎসালয়লৈ প্ৰেৰণ কৰে যদিও টেলকো মুণ্ডাৰ আঘাত অধিক গুৰুতৰ হোৱাত চিকিৎসকে গুৱাহাটী মেডিকেল কলেজ হাস্পাতাললৈ প্ৰেৰণ কৰে বুলি জানিব পৰা গৈছে।

আনহাতে চাপানলা খণ্ড বন কাৰ্যালয়ৰ বনৰক্ষীৰ দল খবৰ পোৱাৰ পাছতো ঘটনাস্থলীত উপস্থিত নোহোৱাৰ অভিযোগ উত্থাপিত কৰিছে স্থানীয় লোকে।