এন আৰ চি : দাবী-আপত্তিৰ সময়সীমা পুনৰ বৃদ্ধি সন্দৰ্ভত আজি উচ্চতম ন্যায়ালয়ত গুৰুত্বপূৰ্ণ শুনানি

এন আৰ চিৰ খচৰাত বাদ পৰাসকলে দাবী-আপত্তি দাখিল কৰা সময়সীমা অহা ১৫ ডিচেম্বৰত অন্ত পৰাৰ কথা আছে যদিও আজি শীৰ্ষ আদালতখনে এই সীমা বৃদ্ধিৰ বাবে বিভিন্ন পক্ষই জনোৱা আৱেদনৰ শুনানি গ্ৰহণ কৰিব।

অসম চৰকাৰ, আমছুকে ধৰি কেইবাটাও পক্ষই এই সময়সীমা বৃদ্ধিৰ বাবে আদালতক আৱেদন জনাইছে।

উল্লেখযোগ্য যে এন আৰ চিৰ খচৰাৰ পৰা ৪০ লাখতকৈয়ো অধিক লোকৰ নাম বাদ পৰি ৰৈছে। এইসকল লোকক তেওঁলোকৰ নাম অন্তৰ্ভুক্তিৰ বাবে দাবী কৰি যাৱতীয় নথি আৰু তথ্যৰ সৈতে আৱেদন দাখিল কৰিবলৈ নিৰ্দিষ্ট সময় ধৰি দিয়া হৈছিল। এই সময়সীমা উচ্চতম ন্যায়ালয়ৰ সংশ্লিষ্ট বিচাৰপীঠে পূৰ্বে দুবাৰকৈ বৃদ্ধি কৰিছে।

যোৱা ২৫ ছেপ্তেম্বৰৰ পৰা এই দাবী-আপত্তি গ্ৰহণ প্ৰক্ৰিয়া চলি আছে যদিও বাদ পৰা লোকৰ অনুপাতে নাম অন্তৰ্ভুক্তিৰ দাবী কৰা লোকৰ সংখ্যা তেনেই কম। ইয়ালৈ লক্ষ্য ৰাখি আৰু পঞ্চায়ত নিৰ্বাচন, ধান চপোৱাৰ সময় আদিৰ পৰিপ্ৰেক্ষিতত আদালতক সময়সীমা পুনৰ বৃদ্ধি কৰিবলৈ বিভিন্ন পক্ষই আৱেদন জনাব।

মন কৰিব লগীয়া যে যোৱা ১০ ডিচেম্বৰত আলফাৰ সাধাৰণ সম্পাদক অনুপ চেতিয়ায়ো এই সময়সীমা বৃদ্ধি কৰিব লাগে বুলি চৰকাৰক আহ্বান জনাইছিল। তেওঁৰ মতে বহুতো খিলঞ্জীয়া লোকেও খচৰাত তেওঁলোকৰ নাম অন্তৰ্ভুক্তিৰ বাবে আৱেদন জানবলৈ বাকী থাকিব পাৰে।

আজি এই গুৰুত্বপূৰ্ণ বিষয়টো সন্দৰ্ভত শুনানি লৈ দাবী-আপত্তিৰ সময়সীমা বৃদ্ধি কৰা হ’ব নে নাই সেই সন্দৰ্ভত সিদ্ধান্ত দিব উচ্চতম ন্যায়ালয়ৰ সংশ্লিষ্ট বিচাৰপীঠখনে।

জানিব পৰামতে, যোৱা ৮ ডিচেম্বৰত অসম চৰকাৰে এখন শপতনামা যোগে এই প্ৰক্ৰিয়াৰ ম্যাদ বৃদ্ধি কৰাৰ বাবে আৱেদন জনাইছিল। আৱেদন জনাইছিল আমছুকে ধৰি আন কেইটামান সংগঠনেও।

ইয়াৰ উপৰি ১০ ডিচেম্বৰত ৰাজ্য চৰকাৰৰ হৈ কেন্দ্ৰৰ ছলিচিটৰ জেনেৰেল তুষাৰ মেহতা আৰু ৰাজ্যৰ প্ৰতিনিধি হিচাপে অধিবক্তা শুভদীপ ৰায়ে মুখ্য ন্যায়ধীশ আৰু ন্যায়াধীশ সঞ্জয় কিশন কৌলেৰে গঠিত এখন বিচাৰপীঠত বিষয়টো উত্থাপন কৰিছিল। ইয়াৰ পিছতে উক্ত বিচাৰপীঠে সমগ্ৰ বিষয়টোত আজি শুনানি গ্ৰহণ কৰা হ’ব বুলি ঘোষণা কৰে।

অৱশ্যে দাবী-আপত্তিৰ সময়সীমা বৃদ্ধিৰ বাবে মুখ্য ন্যায়াধীশ ৰঞ্জন গগৈ আৰু ৰোহিণ্টন ফলি নাৰিমনেৰে গঠিত খণ্ড বিচাৰপীঠেই শুনানি গ্ৰহণ কৰিব আৰু সিদ্ধান্ত দিব বুলি জানিব পৰা গৈছে। দিনৰ দুই বজাৰ পৰা এই শুনানি হ’ব।