চামগুৰিত বিক্ষিপ্ত ঘটনাৰে সৰ্বাত্মক অসম বন্ধ : আটকাধীন ছাত্ৰ নেতাৰ মুক্তিৰ দাবীত থানা ঘেৰাও

নগাঁও জিলাৰ চামগুৰিত আজি সদৌ অসম ছাত্ৰ সন্থাৰ লগতে কেইবাটাও খিলঞ্জীয়া সংগঠনে আহ্বান জনোৱা অসম বন্ধৰ সৰ্বাত্মক প্ৰভাৱ পৰা পৰিলক্ষিত হয়। আজি পুৱা পাঁচ বজাৰ পৰাই চামগুৰি বৃহত্তৰ ৩৭নং ৰাষ্ট্ৰীয় ঘাইপথত যাতায়ত কৰা গাড়ীকে ধৰি দোকান বজাৰ, যান বাহনসমূহ বন্ধ থাকে।

নগাঁও জিলাৰ ৩৭ নং ৰাষ্ট্ৰীয় ঘাইপথৰ পুৰণিগুদামৰ গড়মৃৰ তিনি আলি, বৃহত্তৰ চামগুৰিৰ  আমনি তিনি আলি, তেলিয়াগাঁও তিনি আলি, পহুকটা তিনি আলি, চামগুৰি এ এছ ই বি তিনি আলি, চামগুৰি তিনি আলিকে ধৰি তেলিয়াগাঁৱস্থিত  কলিয়াবৰ জিলাৰ বিজেপিৰ কাৰ্যালয়ৰ সন্মুখত প্ৰতিবাদকাৰীয়ে  টায়াৰ জ্বলাই পথ অৱৰোধ কৰি উত্তাল প্ৰতিবাদ সাব্যস্ত কৰে।

আনহাতে, প্ৰতিবাদকাৰীসকলে বিভিন্ন ঠাইত পথ অৱৰোধ কৰি প্ৰতিবাদ সাব্যস্ত কৰি থকাৰ সময়তে তেলিয়াগাঁও তিনি আলিৰ ৩৭ নং ৰাষ্ট্ৰীয় ঘাইপথেৰে গুৱাহাটীৰ পৰা উজনি অভিমুখী এ এছ টি চিৰ এখন বাছ প্ৰতিবাদকাৰীয়ে ৰখোৱাক কেন্দ্ৰ কৰি আৰক্ষীৰ লগত হতাহতি লাগে।

এনে সময়তে এজন আৰক্ষীয়ে সদৌ অসম ছাত্ৰ সন্থাৰ পতাকা খন জব্দ কৰিবলৈ লওঁতেই পৰিস্থিতি অধিক উত্তাল হৈ পৰে। পৰবৰ্তী সময়ত চামগুৰি থানাৰ ভাৰপ্ৰাপ্ত আৰক্ষী বিষয়া ৰাজীৱ বৰ্মনৰ নেতৃত্ব যোৱা আৰক্ষীৰ এটি দলে ঘটনাস্থলীৰ পৰা সদৌ অসম ছাত্ৰ সন্থাৰ নগাঁও জিলা সমিতিৰ ক্ৰীড়া সম্পাদক অপৰূপ শইকীয়া আৰু অসম সেনাৰ চামগুৰি আঞ্চলিকৰ সংগঠক তথা প্ৰাক্তন ছাত্ৰ নেতা  মানস জ্যোতি বৰাক আটক কৰি চামগুৰি থানালৈ লৈ আনে।

ইপিনে দুজন ছাত্ৰ নেতাক আৰক্ষীয়ে আটক কৰাক কেন্দ্ৰ কৰি পৰবৰ্তী সময়ত প্ৰতিবাদকাৰীৰ একাংশই চামগুৰি থানা ঘেৰাও কৰি প্ৰতিবাদ সাব্যস্ত কৰে। থানাত বিনা চৰ্তে দুই সতীৰ্থৰ মুক্তিৰ দাবী জনাই প্ৰতিবাদ সাব্যস্ত কৰি থকা অৱস্থাতে চামগুৰি ৰাজহ চক্ৰ বিষয়া সঞ্জীৱ দলৈৰ উপস্থিতিত আন ১৮ গৰাকী প্ৰতিবাদকাৰীক আটক কৰে।