পুনৰ হিমন্তৰ মিথ্যাচাৰ ফাদিল হ’ল আৰক্ষী সঞ্চালক প্ৰধানৰ ভাষ্যত

অৰ্ণমাই বৰাৰ হত্যাকাণ্ড, মইনবড়ি সত্ৰৰ বেদখল আদি প্ৰসংগৰে ধৰ্মীয় সংখ্যালঘুক উদ্দেশ্যি মন্ত্ৰী হিমন্ত বিশ্ব শৰ্মাই কৰা মন্তব্য মিথ্যাচাৰ বুলি ফাদিল হোৱাৰ পাছত তেওঁ বাছি লৈছিল নতুন বিষয়। কিন্তু নতুন বিষয়টো প্ৰকাশ কৰাৰ এদিন পাছতেই পুনৰ প্ৰকাশিত হ’ল বহুবল্কী মন্ত্ৰীজনৰ মিথ্যাচাৰ।

উল্লেখযোগ্য যে মন্ত্ৰীজনে ১ ফেব্ৰুৱাৰিত নাগৰিকত্ব সংশোধনী বিধেয়কৰ বিৰুদ্ধে ৰাজ্যত চলি থকা আন্দোলন আলফাৰ দ্বাৰা নিয়ন্ত্ৰিত বুলি সাংবাদিকৰ আগত নতুন বিষয়ৰ অৱতাৰণা কৰিছিল। আলফাৰ ফোনত এই আন্দোলন চলি থকা বুলিও মন্ত্ৰীজনে দাবী কৰিছিল।

কিন্তু হিমন্তৰ এই দাবী ভিত্তিহীন! এই কথা প্ৰকাশ পাইছে ৰাজ্যৰ আৰক্ষী সঞ্চালক প্ৰধান কুলধৰ শইকীয়াৰ ভাষ্যত।

আজি, ২ ফেব্ৰুৱাৰিত জনতা ভৱনত অনুষ্ঠিত এখন সংবাদমেলত আৰক্ষী সঞ্চালক প্ৰধানগৰাকীক মন্ত্ৰী হিমন্তই কৰা মন্তব্য সম্পৰ্কত কি তথ্য আছে বুলি সোধাত তেওঁ কয়, ‘‘এই সম্পৰ্কত আমি বিশেষভাৱে বিশ্লেষণ কৰিব লাগিব। ইয়াৰ তদন্ত কৰিব লাগিব, তেতিয়াহে এই বিষয়ত তথ্য ওলাব। বৰ্তমান তাতকৈ বেছি একো ক’ব পৰা নাযাব’’।

কুলধৰ শইকীয়াৰ মন্তব্যত এটা কথা স্পষ্ট হৈ পৰিল যে মন্ত্ৰী হিমন্ত বিশ্ব শৰ্মাই কোৱা ধৰণে আলফাৰ নিৰ্দেশত নাগৰিকত্ব সংশোধনী বিধেয়ক বিৰোধী আন্দোলন চলা সন্দৰ্ভত অসম আৰক্ষী তথা ৰাজ্যৰ গৃহবিভাগৰ ওচৰত কোনো তথ্যই নাই।

তেনেক্ষেত্ৰত অৰ্ণমাই বৰা আৰু মইনবড়ি সত্ৰৰ নাম ব্যৱহাৰ কৰি বিফল হোৱা হিমন্ত বিশ্ব শৰ্মাই মনেসজা কথাৰে নাগৰিকত্ব সংশোধনী বিধেয়ক বিৰোধী আন্দোলনক বিপথে পৰিচালিত কৰাৰ বাবে যে পুনৰ এক পৰিকল্পনা হাতত লৈছিল সেই কথা প্ৰমাণিত হ’ল।

উল্লেখ্য যে, ১ ফেব্ৰুৱাৰিত হিমন্ত বিশ্ব শৰ্মাই সংবাদ মাধ্যমৰ আগত আন্দোলনটোক নিয়ন্ত্ৰণ কৰা শক্তি বিদেশত আছে আৰু এই কথাটো চৰকাৰৰ মানুহ হিচাপে তেওঁ নিজে গম পাই থকা বুলি জানিবলৈ দিছিল। তেওঁ লগতে দাবী কৰিছিল, ‘‘আন্দোলনটোত ক’ৰবাত নহয় ক’ৰবাত আলফাই ভূমিকা লৈ আছে।”

‘‘কাৰ ওচৰলৈ ফোন আহি আছে, কোন সাংবাদিকলৈ ফোন আহি আছে, চৰকাৰত থাকি আমি গম পাই আছো’’, সংবাদ মাধ্যমকো অসমৰ পৰিস্থিতিৰ বাবে জগৰীয়া কৰি মন্ত্ৰীজনে এইদৰে দাবী কৰিছিল। এই প্ৰসংগত এজন সাংবাদিকে আৰক্ষী সঞ্চালক প্ৰধানক ‘মিডিয়াকো নিৰীক্ষণত ৰাখিছে নেকি?’ বুলি প্ৰশ্ন কৰাত তেওঁ কয়, ‘‘মিডিয়াক নিৰীক্ষণত ৰাখিব লাগে বুলি মই নাভাবো আৰু তেনেকুৱা এতিয়ালৈ হোৱা নাই।’’

কিন্তু মিডিয়া বা সাংবাদিকক নিৰীক্ষণত নৰখাকৈ মন্ত্ৰী হিমন্ত বিশ্ব শৰ্মাই ‘কোন সাংবাদিকলৈ ফোন আহে’ কেনেকৈ গম পালে?

সংবাদমেলত কুলধৰ শইকীয়াই দুই-এটা বিক্ষিপ্ত ঘটনা ঘটিছে যদিও ৰাজ্যৰ আইন-শৃংখলাজনিত পৰিস্থিতি নিয়ন্ত্ৰণত থকা বুলিও মন্তব্য কৰে।

ইপিনে সংবাদমেলখনত উপস্থিত থকা অসম চৰকাৰৰ মুখ্য সচিব আলোক কুমাৰে ৰাজ্যত চলি থকা আন্দোলনসমূহ গণতান্ত্ৰিক চৰিত্ৰ আৰু শান্তি-শৃংখলা অটুট ৰাখি কৰিবলৈ দল-সংগঠনসমূহলৈ আহ্বান জনায়।