দিল্লী আৰক্ষীৰ কব্জাত মণিপুৰী ছাত্ৰ নেতা, মুক্তিৰ চেষ্টাৰে জনকপুৰী থানাত ভিৰ সতীৰ্থ-এক্টিভিষ্টৰ

নতুন দিল্লীত আৰক্ষীয়ে গ্ৰেপ্তাৰ কৰা মণিপুৰ ষ্টুদেণ্টছ এচ’চিয়েচন দিল্লী (MSAD)ৰ উপদেষ্টা থকচম ৱিৱনৰ মুক্তিৰ দাবীত শুকুৰবাৰে জনকপুৰী থানাত ভিৰ কৰিছে ছাত্ৰ নেতাজনৰ সতীৰ্থই।

সংগঠনটোৰ সূত্ৰই সদৰী কৰা মতে ৱিৱনক গ্ৰেপ্তাৰ কৰা সন্দৰ্ভত কোনো মেম’ আৰক্ষীয়ে প্ৰদান কৰা নাই।

নাগৰিকত্ব বিধেয়ক বিৰোধিতাৰ লগতে ৰাষ্ট্ৰীয় নিৰাপত্তা আইনৰ অধীনত মণিপুৰী সাংবাদিক ৱাংখেম কিশোৰচন্দ্ৰক বন্দী কৰাৰ প্ৰতিবাদ কৰাৰ বাবেই ছাত্ৰ নেতা ৱিৱনক গ্ৰেপ্তাৰ কৰা হৈছে বুলি আশংকা কৰিছে সতীৰ্থই।

ছাত্ৰ নেতাজনৰ ওপৰতো সাংবাদিক কিশোৰচন্দ্ৰৰ দৰেই ৰাষ্ট্ৰদ্ৰোহৰ গোচৰ জাপি দিয়াৰ আশংকা কৰি তেওঁৰ মুক্তিৰ দাবী উত্থাপন কৰিছে। সূত্ৰ অনুসৰি শনিবাৰে ৱিৱনক মণিপুৰলৈ নিয়াৰ কথা।

উত্তৰ-পূৰ্বাঞ্চলত ব্যাপক বিৰোধিতাৰ সন্মুখীন হোৱা নাগৰিকত্ব বিধেয়কৰ বিৰুদ্ধে প্ৰতিবাদ কৰাৰ বাবে যোৱা ১২ ফেব্ৰুৱাৰিত ৱিৱনক মণিপুৰ আৰক্ষীয়ে “সকীয়নি” দিছিল, সতীৰ্থৰ মন্তব্য।

মণিপুৰৰ বিজেপি নেতৃত্বাধীন চৰকাৰখনৰ বিৰুদ্ধে সৰৱ ছাত্ৰ নেতাজনে সাংবাদিক কিশোৰচন্দ্ৰক গ্ৰেপ্তাৰৰ বিৰুদ্ধে নতুন দিল্লীত মণিপুৰী ছাত্ৰৰ প্ৰতিবাদত নেতৃত্ব দিছিল।