নিউজিলেণ্ডত বন্দুকধাৰীৰ ভয়াৱহ আক্ৰমণত কথমপি প্ৰাণৰক্ষা বাংলাদেশ ক্ৰিকেট দলৰ

নিউজিলেণ্ডৰ খ্ৰীষ্টচাৰ্ছ চহৰৰ দুটা মছজিদত আজি অচিনাক্ত বন্দুকধাৰীয়ে চলোৱা ভয়াৱহ আক্ৰমণৰ পৰা কথমপি প্ৰাণ ৰক্ষা পৰে নিউজিলেণ্ড ভ্ৰমণৰত বাংলাদেশ ক্ৰিকেট দলৰ খেলুৱৈসকল। ঘটনাস্থলীত খেলুৱৈ সকলৰ তৎপৰতা আৰু উদ্ধাৰকাৰী দলৰ সহযোগত কোনোমতে প্ৰাণৰক্ষা পৰে ভ্ৰমণকাৰী দলটোৰ খেলুৱৈসকলৰ।

বাংলাদেশ ক্ৰিকেট ব’ৰ্ডৰ তৰফৰ পৰা প্ৰকাশ কৰা টুইটাৰত দলটোৰ আটাইকেইজন খেলুৱৈ নিৰাপদে আছে বুলি প্ৰকাশ কৰে। আকস্মিক আক্ৰমণত এজনো খেলুৱৈ হতাহত হোৱা নাই যদিও খেলুৱৈ সকল মানসিকভাবে সুস্থ হোৱাৰ বাবে কিছু সময়ৰ প্ৰয়োজন হ’ব বুলি ব’ৰ্ডে উল্লেখ কৰে।

আনহাতে বাংলাদেশ ক্ৰিকেট দলৰ তাৰকা বেটছমেন তামিম ইকবালে ভয়াৱহ আক্ৰমণৰ পৰা কোনোমতে ৰক্ষা পৰিলো, বুকুৰ ঢপঢপনি এতিয়াও মাৰ যোৱা নাই বুলি টুইট কৰে।

উল্লেখযোগ্য যে বাংলাদেশ ক্ৰিকেট দলটো নিউজিলেণ্ডৰ খ্ৰীষ্টচাৰ্ছ চহৰত থকা এটা মছজিদ ভ্ৰমণ কৰিবলৈ যোৱাৰ সময়তে মছজিদটোত অচিনাক্ত বন্দুকধাৰীয়ে ভয়াৱহ আক্ৰমণ সংঘটিত কৰে। এই আক্ৰমণত এতিয়ালৈ ৪৯ জন লোকে প্ৰাণ হেৰুৱাইছে আৰু ৩০ জনতকৈও অধিক লোক আহত হৈছে।

নিউজিলেণ্ডৰ প্ৰধানমন্ত্ৰী জেকিণ্ডা আৰডেৰ্ণে সংবাদমেল যোগে দুৰ্ঘটনা সন্দৰ্ভত শোক ব্যক্ত কৰি আজিৰ দিনটোক দেশখনৰ বাবে ক’লা দিন হিচাপে অভিহিত কৰে আৰু নিউজিলেণ্ডে কেতিয়াও সন্ত্ৰাসবাদী কাৰ্য্যকলাপক ক্ষমা নকৰে বুলি কঠোৰ ব্যৱস্থা ল’ব বুলি কয়।