নিজ কাৰ্যালয় চৌহদতে সাংবাদিক চক্ৰপাণি পৰাশৰক ছুৰীৰে আক্ৰমণ দুৰ্বৃত্তৰ

২১ মাৰ্চ অৰ্থ্যাৎ বৃহস্পতিবাৰে নিশা গুৱাহাটীত সংঘটিত হৈছে এক ভয়ংকৰ ঘটনা। নিশা প্ৰায় ১০ মান বজাত এটা দুৰ্বৃত্তৰ দলে নিউজ ১৮ চেনেলৰ সাংবাদিক চক্ৰপাণি পৰাশৰক ছুৰীৰে আক্ৰমণ কৰে। এই ঘটনাই সম্প্ৰতি গুৱাহাটীত তীব্ৰ চাঞ্চল্যৰ সৃষ্টি কৰিছে।

ঘটনা সন্দৰ্ভত লাভ কৰা তথ্য অনুসৰি গুৱাহাটীৰ অতিকৈ ব্যস্ত এলেকা গণেশগুৰিস্থিত নিউজ ১৮ৰ কাৰ্যালয় চৌহদতে এখন ৰেস্তোৰাঁৰ মালিকে কেইজনমান কৰ্মচাৰীৰে মিলি সাংবাদিক পৰাশৰক ছুৰীৰে আক্ৰমণ কৰি প্ৰাণে মৰাৰ চেষ্টা কৰে।

এই ঘটনাত গুৰুতৰভাৱে আহত হোৱা সাংবাদিকগৰাকীক লগে লগে দিচপুৰস্থিত জি এন আৰ চি হাস্পতাললৈ চিকিৎসাৰ বাবে লৈ যোৱা হয়। বৰ্তমান সাংবাদিকজন সুস্থ বুলি চিকিৎসালয় কৰ্তৃপক্ষই জানিবলৈ দিয়ে।

উল্লেখ্য যে বৃহস্পতিবাৰে ৰাতিপুৱা এলবাৰ ইটছ নামৰ ৰেষ্টোৰাঁখনৰ মালিকৰ সৈতে সাংবাদিক পৰাশৰৰ সামান্য কথাত কাজিয়াৰ সূত্ৰপাত হৈছিল। আৰু ইয়াৰ প্ৰতিশোধ লোৱাৰ উদ্দেশ্যেই ৰেস্তোৰাঁখনৰ মালিক আৰু তেওঁৰ আন কেইজনমান কৰ্মচাৰীৰ সৈতে মিলি নিশা অতৰ্কিতে সাংবাদিকগৰাকীক উপৰ্যপুৰি দুবাৰকৈ ছুৰীৰে আক্ৰমণ কৰে।

এই ঘটনা সংঘটিত হোৱাৰ কিছু সময়ৰ পাছতে দিচপুৰ আৰক্ষীৰ এটা দলে ঘটনাৰ সৈতে জড়িত ৰেস্তোৰাঁখনৰ মালিকসহ আন তিনিজন লোকক আটক কৰে। আটকাধীন লোক কেইজন ভৱেশ দাস, নিতিন শৰ্মা, নিৰাজ আহমেদ আৰু চৈয়দ আলী আহমেদ বুলি জানিবলৈ দিছে।