গুৱাহাটীৰ দুই বাইদেউৰ ঘোষিত সম্পত্তি : সবাৰো ওপৰত কুইন ওজা

সমাগত লোক সভা নিৰ্বাচনত গুৱাহাটী লোকসভা সমষ্টিৰ বাবে এতিয়ালৈ চাৰিগৰাকী প্ৰাৰ্থীয়ে মনোনয়ন দাখিল কৰিলে। সমষ্টিটোৰ বাবে দেশৰ দুটাকৈ প্ৰধান ৰাজনৈতিক দল কংগ্ৰেছ আৰু বিজেপিৰ উপৰি নিৰ্বাচনৰ বাবে মনোনয়ন দাখিল কৰিছে অল ইণ্ডিয়া তৃণমূল কংগ্ৰেছ আৰু স্বৰ্ণ ভাৰত পাৰ্টিৰ প্ৰাৰ্থীয়ে।

সমষ্টিটোৰ বাবে ১ এপ্ৰিললৈকে মনোনয়ন দাখিল কৰা চাৰিগৰাকী প্ৰাৰ্থীৰ ভিতৰত দেশৰ প্ৰধান দুই ৰাজনৈতিক দলৰ দুয়োগৰাকী কোটিপতি।

গুৱাহাটীত প্ৰতিদ্বন্দ্বিতা আগবঢ়োৱা বিজেপিৰ প্ৰাৰ্থী কুইন ওজাই মনোনয়ন পত্ৰৰ লগত দাখিল কৰা সম্পত্তিৰ তথ্য অনুসৰি তেওঁৰ নিজৰ নামত মুঠ ৩,৯৩,৬৯,২৬৪.৮৩ টকাৰ অস্থাৱৰ সম্পত্তি আছে। আনহাতে তেওঁৰ স্বামীৰ নামত থকা মুঠ অস্থাৱৰ সম্পত্তিৰ মূল্য ৪,১৯,২৮,৫০১.৭৮ টকা। দুয়োৰে মিলাই মুঠ অস্থাৱৰ সম্পত্তিৰ মূল্য প্ৰায় ৮ কোটি টকা।

ইয়াৰ উপৰি গুৱাহাটী ৬টা স্থানত তেওঁৰ নামত থকা মাটি, ফ্লেট, কমাৰ্চিয়েল বিল্ডিঙকে ধৰি স্থাৱৰ সম্পত্তিৰ মূল্য ৩২,৪৯,৮৭,৮০৫.০০ টকা। আনহাতে, তেওঁৰ স্বামীৰ নামত আছে ২২,৩৯,৩৪,০০০.০০ টকাৰ স্থাৱৰ সম্পত্তি। দুয়োৰে মুঠ স্থাৱৰ সম্পত্তিৰ মূল্য প্ৰায় ৫৫ কোটি টকা।

ব্যৱসায়ক পেচা হিচাপে শপতনামাত লিপিবদ্ধ কৰা কুইন ওজাৰ ২০১৭-২০১৮ বৰ্ষত বাৰ্ষিক আয় আছিল ৪৯,৫৫,৬০৪.০০ টকা। তেওঁৰ স্বামীৰ একেটা বৰ্ষত তেওঁৰ স্বামীৰ আয় ৩৪,৪১,২৮০.০০ টকা।

ইপিনে, কংগ্ৰেছৰ প্ৰাৰ্থী ববিতা শৰ্মাৰ হাতত থকা নগদ ধনৰ উপৰি গহনা, বাহন, বেংক, শ্বেয়াৰ বজাৰ আদিৰ জমাকে ধৰি মুঠ অস্থাৱৰ সম্পত্তিৰ মূল্য ৮৪,৯০,০৯৭.৪৮ টকা। তেওঁৰ স্বামীৰ নামত থকা অস্থাৱৰ সম্পত্তিৰ মূল্য ২,২১,৩১,৬৮৫.৩০ টকা। দুয়োৰে মুঠ অস্থাৱৰ সম্পত্তিৰ মূল্য প্ৰায় ৩ কোটি টকা।

ইয়াৰ উপৰি জ্যেষ্ঠ কন্যাৰ নামত আছে ৩৪,০২,৪৬৮.০০ আৰু কনিষ্ঠা কন্যাৰ নামত আছে ৮,৭৫,৫৬১.০০ টকাৰ আস্থাৱৰ সম্পত্তি।

ববিতা শৰ্মাৰ নিজৰ নামত থকা স্থাৱৰ সম্পত্তিৰ মূল্য প্ৰায় ৬০,০০,০০০.০০ টকা। আনহাতে তেওঁৰ স্বামীৰ নামত থকা স্থাৱৰ সম্পত্তিৰ মূল্য প্ৰায় ১২,১৫,০০,০০০.০০ টকা। দুয়োৰে স্থাৱৰ সম্পত্তিৰ মুঠ পৰিমাণ প্ৰায় চাৰে বাৰ কোটি টকা।