নুমলীগড়ত তেলৰ টেংকীৰ ভিতৰত যুৱকৰ মৃতদেহ উদ্ধাৰ

নুমলীগড় তেলগৰমত এখন তেল টেংকাৰৰ টেংকীৰ ভিতৰত এজন যুৱকৰ মৃতদেহ উদ্ধাৰ হোৱা ঘটনাক লৈ অঞ্চলটোত চাঞ্চল্যৰ সৃষ্টি হৈছে। মৃতদেহটো নুমলীগড়ৰ ৰংবঙৰ ঋতু দাসৰ বুলি স্থানীয় লোকে চিনাক্ত কৰিছে।

ঘটনাৰ বিৱৰণী মতে এ এছ ০৪ জি ০১৮৩ নম্বৰৰ টেংকাৰখনৰ হেণ্ডিমেন ঋতু দাসে মঙলবাৰৰ দিনা টেংকৰী ভিতৰত প্ৰৱেশ কৰি চাফা কৰি আছিল। আৰু টেংকীৰ ভিতৰতেই মৃত্যুক সাবটি লয়। পিছত টেংকাৰখনৰ চালকজনে খবৰ লোৱাতহে যুৱকজনক টেংকীৰ ভিতৰত মৃত অৱস্থাত প্ৰত্যক্ষ কৰে।

স্থানীয় একাংশ লোকে যুৱকজনে টেংকীৰ ভিতৰত চাফা কৰি থাকোতে টেংকীৰ ভিতৰত থকা গেছৰ প্ৰভাৱতে মৃত্যুক সাবটি লোৱা বুলি সন্দেহ প্ৰকাশ কৰিছে। ইফালে মৃত দেহ উদ্ধাৰৰ বাবে আজি টেংকীৰ ভিতৰত প্ৰৱেশ কৰা এজন যুৱকো টেংকীৰ ভিতৰতেই অসুস্থ হৈ পৰে।

অৱশ্যে আৰক্ষীৰ তদন্তৰ পিছতহে ঘটনাৰ প্ৰকৃত ৰহস্য পোহৰলৈ আহবি। ইতিমধ্যে নুমলীগড় আৰক্ষীয়ে এই ঘটনা সন্দৰ্ভত তদন্ত আৰম্ভ কৰিছে।