শাসনলৈ আহিলে কলিয়াবৰ হাতীমুৰা মথাউৰি নিৰ্মাণ আৰু ক্ষতিপূৰণ বিতৰণৰ কেলেংকাৰীৰ চিবিআই তদন্ত কৰা হ’ব : গৌৰৱ গগৈ

‘ভাৰতীয় জাতীয় কংগ্ৰেছ শাসনলৈ আহিলে জলসম্পদ মন্ত্ৰী কেশৱ মহন্তৰ সমষ্টি কলিয়াবৰত হাতীমুৰা মথাউৰি কেনেকৈ চিঙিল আৰু এই মথাউৰিটো চিঙাৰ পিছত ক্ষতিগ্ৰস্তৰ মাজত ক্ষতিপূৰণ বিতৰণত হোৱা কেলেংকাৰীৰ চি বি আই তদন্ত কৰা হ’ব।’ এই মন্তব্য কলিয়াবৰ লোকসভা সমষ্টিৰ কংগ্ৰেছ প্ৰাৰ্থী গৌৰৱ গগৈৰ।

আজি কলিয়াবৰ লোকসভা সমষ্টিৰ বোকাখাতত কংগ্ৰেছৰ এক নিৰ্বাচনী প্ৰচাৰত অংশ গ্ৰহণ কৰি কংগ্ৰেছ প্ৰাৰ্থী গৌৰৱ গগৈয়ে কলিয়াবৰ সমষ্টিত আপোনালোকে পদুম ফুল দেখিছেনে বুলি প্ৰশ্ন কৰি কয় যে এইবাৰ কলিয়াবৰত পদুম ফুলা নাই। লগতে গোটেইবোৰ ফাঁকি কথা কৈ ৰাইজৰ ৰোষত পৰাৰ ভয়ত এইবাৰ নিৰ্বাচনত পদুমফুল হাতীৰ আঁৰত লুকাল বুলি গৌৰৱ গগৈয়ে মন্তব্য কৰে।

কোন চকীদাৰে বাৰে বাৰে বিদেশলৈ যায়। দামী আৰু বিলাসী পোচাক পিন্ধে আৰু তাৰ বাবে আপোনালোকৰ পৰা টেক্স কাটে বুলিও মন্তব্য কৰে গৌৰৱ গগৈয়ে। বৰজুৰিৰ নিৰ্বাচনী সভাত গৌৰৱ গগৈৰ উপৰিও প্ৰদেশ কংগ্ৰেছৰ বিধায়িনী দলৰ সভাপতি দেবব্ৰত শইকীয়া, বোকাখাতৰ প্ৰাক্তন বিধায়ক অৰুণ ফুকন, ব্লক সভাপতি ধৰ্মেশ্বৰ কুৰ্মীৰ উপৰিও বিভিন্ন কৰ্মকৰ্তা উপস্থিত থাকে।

এই সভাতে মধ্য কাজিৰঙাৰ অগপ দলৰ আঞ্চলিক পঞ্চায়তৰ বাবে নিৰ্বাচিত প্ৰাৰ্থী হোমেন ভূমিজৰ আৰু কাজিৰঙা সমবায় সমিতিৰ প্ৰাক্তন সম্পাদক মৃদুল গগৈৰ সৈতে ২০ জন ব্যক্তি আৰু বিমান দলেৰ নেতৃত্বত মৰিধনশিৰি অঞ্চলৰ ১৬ ব্যক্তিয়ে কংগ্ৰেছ দলত যোগদান কৰে।

নিৰ্বাচনী প্ৰচাৰত অংশ গ্ৰহণ কৰি বিধায়িনী দলপতি দেবব্ৰত শইকীয়াই নৰেন্দ্ৰ মোডীৰ চৰকাৰে অসমৰ প্ৰতিখন চাহ বাগিছাত এ টি এম স্থাপন কৰিম বুলি প্ৰতিশ্ৰুতি দিও এ টি এম স্থাপন কৰিব নোৱাৰি টেবুলতে দৰমহা দি আছে আৰু চাহ বাগিছাত ১০০ স্কুল দিম বুলিও দিব নোৱাৰিলে বুলি উল্লেখ কৰি বিজেপি দলক সমালোচনা কৰে।