প্ৰচাৰ চলোৱাৰ ক্ষেত্ৰত কংগ্ৰেছ প্ৰাৰ্থী ববিতা শৰ্মাই মোক নকল কৰে : কুইন ওজা

‘’গুৱাহাটীৰ কংগ্ৰেছ প্ৰাৰ্থী ববিতা শৰ্মাই মোক নকল কৰে। ৰাইজৰ মাজত মই যেনেদৰে প্ৰচাৰ চলাইছো, ঠিক তাৰ পিছতে ববিতা শৰ্মাইও সেইদৰে প্ৰচাৰ চলাইছে।‘’ এই মন্তব্য গুৱাহাটী লোকসভা সমষ্টিৰ বিজেপি প্ৰাৰ্থী কুইন ওজাৰ।

পশ্চিম গুৱাহাটী সমষ্টিৰ আগছিয়াৰ নিৰ্বাচনী সভাত শনিবাৰে এইদৰে মন্তব্য কৰে বিজেপিৰ প্ৰাৰ্থীগৰাকীয়ে।

আনহাতে, বিজেপি মিত্ৰজোঁটৰ প্ৰচাৰ দেখি কংগ্ৰেছ শংকিত হৈ পৰা বুলিও মন্তব্য কৰি ওজাই কয় যে ইয়াৰ বাবে ব্যাপক প্ৰচাৰ চলোৱাৰ পৰিৱৰ্তে ‘ববিতা শৰ্মাই মোক নকল কৰাত ব্যস্ত আছে’।

বিজেপি প্ৰাৰ্থীগৰাকীয়ে শনিবাৰে তেওঁৰ মাৰাথন নিৰ্বাচনী প্ৰচাৰত গুৱাহাটী সমষ্টিৰ কেইবাঠাইতো নিৰ্বাচনী প্ৰচাৰ চলায়।

নিৰ্বাচনী প্ৰচাৰত ওজাই প্ৰধানমন্ত্ৰী নৰেন্দ্ৰ মোদীৰ সবল নেতৃত্বত কেন্দ্ৰীয় চৰকাৰে সৰ্বস্তৰৰ ৰাইজৰ অকুণ্ঠ সমৰ্থন লাভ কৰিবলে সক্ষম হোৱা বুলি দাবী কৰে ৷ শনিবাৰে পশ্চিম গুৱাহাটী বিধানসভা সমষ্টিৰ অৰ্ন্তগত ৰাণী মণ্ডলৰ নিৰ্বাচনী সভাত ৰাজ্যিক সভাপতি ৰনজিৎ কুমাৰ দাস আৰু স্থানীয় বিধায়ক ৰমেন্দ্ৰ নাৰায়ন কলিতাৰ উপস্থিতিত ওজাই নিৰ্বাচনী প্ৰচাৰ চলায়।

বিজেপি প্ৰাৰ্থী গৰাকীয়ে দেশৰ সৰ্বাংগীন উন্নয়ন অব্যাহত ৰখাৰ স্বাৰ্থত প্ৰধানমন্ত্ৰী নৰেন্দ্ৰ মোডীক সমৰ্থন জনাই আগন্তুক নিৰ্বাচনত তেওঁক গুৱাহাটী সমষ্টিৰ পৰা জয়যুক্ত কৰাৰ বাবে আহ্বান জনায়।