মোদীক পৰিবাৰৰ কথা নুসুধিলে কিয় অক্ষয় কুমাৰে?

প্ৰধান মন্ত্ৰিত্বৰ পাঁচ বছৰীয়া কাৰ্য্যকালত এখনো সংবাদমেল সম্বুধিবলৈ “সাহস নকৰা” নৰেন্দ্ৰ মোদীয়ে বলিউদ অভিনেতা অক্ষয় কুমাৰক দিয়া “অৰাজনৈতিক সাক্ষাৎকাৰ”ক তীব্ৰ সমালোচনা কৰিছে অসমৰ প্ৰাক্তন মুখ্য মন্ত্ৰী তৰুণ গগৈয়ে।

দেশৰ সাধাৰণ নিৰ্বাচনৰ মাজতে লোৱা সাক্ষাৎকাৰটো “ফিক্সাৰ” বুলি মন্তব্য কৰি গগৈৰ প্ৰশ্ন ব্যক্তিগত জীৱনক লৈ কথা পতা সাক্ষাৎকাৰত মোদীৰ পৰিবাৰৰ কথা নুসুধিলে কিয় অক্ষয় কুমাৰে?

“অক্ষয় কুমাৰে মোদীৰ ব্যক্তিগত জীৱনক লৈ কথা পাতিছে।….অক্ষয় কুমাৰে নৰেন্দ্ৰ মোদীৰ পৰিবাৰৰ কথা নুসুধিলে কিয়? ৰে’লৱে ষ্টে’চনত তেওঁ চাহ বিক্ৰী কৰাৰ কথা নুসুধিলে কিয়?” সাক্ষাৎকাৰটোক “নাটক” বুলি উল্লেখ কৰি বৃ্হস্পতিবাৰে গুৱাহাটীত সংবাদমেলত গগৈৰ প্ৰশ্ন।

আনহাতে মনমোহন সিঙৰ দৰে পূৰ্বৰ প্ৰধান মন্ত্ৰীক “নিমাতী” বুলি অভিহিত কৰা মোদীয়ে যোৱা ৫ বছৰে এখনো সংবাদমেল সম্বোধন নকৰাক লৈয়ো সমালোচনা কৰিছে গগৈয়ে।

“আজি পাঁচ বছৰত তেওঁৰ সাংবাদিকৰ মুখামুখি হ’বলৈ সাহস নহ’ল। নেহৰুৰ পৰা আৰম্ভ কৰি মনমোহন সিঙলৈ সকলো প্ৰধান মন্ত্ৰীক নিমাতী বুলি কয়। মোদীয়ে বৰ বৰ কথা কয়, কিন্তু এইজনেই প্ৰথম প্ৰধান মন্ত্ৰী যিয়ে পাঁচ বছৰত সংবাদ মাধ্যমৰ সন্মুখত কথা ক’বলৈ সাহস নকৰিলে,” প্ৰাক্তন মুখ্য মন্ত্ৰীজনৰ মন্তব্য। কেন্দ্ৰত কংগ্ৰেছ চৰকাৰ চলি থকা সময়ত নৰেন্দ্ৰ মোদী্য়ে তদানীন্তন প্ৰধান মন্ত্ৰী মনমোহন সিঙক “মৌন মোহন” আখ্যা দিছিল।

গগৈয়ে কয়, পাঁচ বছৰত মোদীয়ে “কি কি কৰিলে” সেয়াহে ৰাইজে জানিব বিচাৰে।

“বিমুদ্ৰাকৰণ, জি এচ টিৰ ফলত কি কি লাভ হ’ল, দেশৰ নিবনুৱা সমস্যা, কৃষকৰ সমস্যা আদি বিষয়লৈহে সাক্ষাৎকাৰ হ’ব লাগিছিল,” গগৈয়ে কয়।

প্ৰধান মন্ত্ৰীৰ সৈতে সাক্ষাৎকাৰটোত “কাপোৰ ধোৱা, মিঠাই পঠিওৱা” আদি বিষয়ে ঠাই পোৱাটোকো প্ৰাক্তন মুখ্য মন্ত্ৰীগৰাকীয়ে সমালোচনা কৰে।

“মোদীয়ে যিবিলাক কথা কৈছে সেয়া কোনে নকৰে? কোন প্ৰধান মন্ত্ৰীয়ে কাপোৰ ধোৱা নাই? কোনে কালৈ মিঠাই পঠিয়াই– এইবিলাক বাৰু সাক্ষাৎকাৰৰ বিষয় নে?” গগৈৰ মত।