শান্তি আলোচনা অগ্ৰাহ্য মেগেনৰ, গণভোটৰ দাবী

দিল্লীৰ সৈতে আলোচনা আৰম্ভ কৰিবলৈ চৰকাৰী প্ৰতিনিধিয়ে দিয়া প্ৰস্তাৱ পুনৰ অগ্ৰাহ্য কৰিছে ইউ এন এল এফৰ ‘অবৈতনিক অধ্যক্ষ’ ৰাজকুমাৰ মেগেন ওৰফে চানায়াইমাই।

তেওঁৰ সৈতে ঘনিষ্ঠ এক সূত্ৰই নৰ্থ ইষ্ট নাও-ক জনায় যে তেওঁৰ দলটোক মেজলৈ আনিলে “তেওঁৰ কাৰাৱাস  সন্দৰ্ভত কিবা এটা” কৰাৰ প্ৰস্তাৱ আগবঢ়াইছিল চৰকাৰী প্ৰতিনিধিসকলে।

যি নহ’লেও, ২০১০ চনৰে পৰা জে’লত থকা বিদ্ৰোহী নেতাজনে ২০২০ত তেওঁৰ ১০ বছৰীয়া কাৰাৱাস সম্পূৰ্ণ কৰিব।

“চানায়াইমাই নিৰৱচ্ছিন্নভাৱে আলোচনাৰ প্ৰস্তাৱ অগ্ৰাহ্য কৰি আহিছে। মণিপুৰত গণভোটৰ দাবী এৰি নিদিবলৈ তেওঁ অটল,” জে’লৰ পৰাই মণিপুৰৰ আটাইতকৈ শক্তিশালী বিচ্ছিন্নতাবাদী গোটটোক নিয়ন্ত্ৰণ কৰি অহা বিদ্ৰোহী নেতাজনৰ ঘনিষ্ঠ এক সূত্ৰত প্ৰকাশ।

তেওঁক কোন চৰকাৰী প্ৰতিনিধি (ৰাজ্য চৰকাৰ বা কেন্দ্ৰৰ)এ কেতিয়া জে’লত লগ কৰিলে সেয়া স্পষ্ট নহয়।

কিন্তু মণিপুৰৰ মুখ্য মন্ত্ৰী এন বীৰেন সিঙে মণিপুৰৰ বহু বিদ্ৰোহী গোটকে মেজলৈ আহি শান্তিপূৰ্ণ সমাধান বিচাৰিবলৈ শেহতীয়া মাহকেইটাত যৎপৰোনাস্তি আহ্বান জনাইছে।

মণিপুৰলৈ স্থায়ী শান্তি ঘূৰাই অনাৰ বাবে আলোচনা আৰম্ভ কৰিবলৈ বিদ্ৰোহীসকল আগবাঢ়ি আহিলে মিজোৰামৰ কংগ্ৰেছ মুখ্য মন্ত্ৰী লালথানৱালাই ১৯৮৬ত কৰাৰ দৰে শাসনৰ পৰা আঁতৰি দিয়াৰ প্ৰস্তাৱো আনকি তেওঁ আগবঢ়াইছে।

ভাৰতীয় সংস্থাসমূহে তেওঁক বিহাৰৰ ম’তিহাৰিৰ পৰা ২০১০ চনৰ ডিচেম্বৰত গ্ৰেপ্তাৰ কৰা দেখুৱাইছে যদিও, বাংলাদেশত চানায়াইমাক ২০১০ৰ ছেপ্তেম্বৰত গ্ৰেপ্তাৰ কৰাৰ পৰাই তেওঁ বন্দী হৈ আছে।

ৰাষ্ট্ৰীয় তদন্তকাৰী সংস্থাই তেওঁৰ যাৱজ্জীৱন কাৰাদণ্ডৰ আহ্বান জনাইছিল যদিও তেওঁক ২০১৬ চনত ১০ বছৰৰ কঠোৰ কাৰাদণ্ড বিহা হয়।

একেটা গোচৰতে আন ১৭গৰাকী ইউ এন এল এফ বিদ্ৰোহীকো সাতৰ পৰা দহ বছৰৰ কাৰাদণ্ড বিহা হৈছিল।

ৰায়দানৰ শুনানিত ধৈৰ্য্য নেহেৰুৱাই আৰ কে মেগেনে ফিদেল কেস্ত্ৰ’ৰ উদ্ধৃতিৰে তেওঁৰ যুঁজৰ ন্যায্যতা প্ৰতিপন্ন কৰিবৰ চেষ্টা কৰিছিল।

“মই ভাৰতৰ পৰা পৃথক হ’বলৈ নহয়, বৃটিশ্ব আৰু তাৰ পিছত ভাৰতে কাঢ়ি অহা মণিপুৰৰ স্বাধীনতা পুনৰুদ্ধাৰৰ বাবেহে যুঁজিছো,” আদালতৰ বাহিৰত অপেক্ষাৰত সাংবাদিকক তেওঁ কৈছিল।

মেগেনকে ধৰি আন অভিযুক্তসকলৰ বিৰুদ্ধে ভাৰতীয় দণ্ডবিধিৰ ১২০ বি, ১২১, ১২১ এ’ আৰু ১২২ ধাৰাৰ অধীনত এন আই এ’ই ২০১০চ০নত গোচৰটো ৰুজু কৰিছিল।

বিদ্ৰোহী গোটটোৰ কাৰণে অস্ত্ৰ গোটোৱাৰ অৰ্থে ২০০৯চনত চীনত কেইবাখনো বৈঠকত বহাৰ অভিযোগেৰে এন আই এ’ই মেগেন আৰু আন ইউ এন এল এফ নেতাসকলৰ বিৰুদ্ধে অভিযোগনামা দাখিল কৰিছিল।

মেগেন প্ৰত্যক্ষ উত্তৰসূৰী বৃটিশ্বৰ বিৰুদ্ধে যুঁজা প্ৰবাদপ্ৰতিম মণিপুৰী বীৰ টিকেন্দ্ৰজিতৰ যাক বৃটিশ্বে ফাঁচিকাঠত ওলোমাইছিল।