চিবিএছ‌ইৰ বিজ্ঞান শাখাত ৯৭.৪ শতাংশ নম্বৰেৰে উজলিল নগাঁও কেন্দ্ৰীয় বিদ্যালয়ৰ ছাত্র উদ্দীপ্ত‌

নগাঁও কেন্দ্ৰীয় বিদ্যালয়ৰ ছাত্ৰ উদ্দীপ্ত কুমাৰ বৰাই সদ্য ঘোষিত চি বি এছ ই ৰ বিজ্ঞান শাখাৰ দ্বাদশ শ্ৰেণীৰ চূড়ান্ত পৰীক্ষাত ৯৭.৪ শতাংশ নম্বৰ লাভ কৰি সুখ্যাতিৰে উত্তীৰ্ণ হৈ উত্তৰ-পূৰ্বাঞ্চলৰ গুৱাহাটী মণ্ডললৈ গৌৰৱ কঢ়িয়াই আনিছে।

মুঠ ৫০০ নম্বৰৰ ভিতৰত ৪৮৭ নম্বৰ লাভ কৰি উদ্দীপ্ত‌ই নগাঁও জিলাৰ ভিতৰতে বিজ্ঞান শাখাত সৰ্বোচ্চ নম্বৰ লাভ কৰিবলৈ সক্ষম হৈছে। তেওঁ ইংৰাজীত ৯৭, গণিতত ৯৭, পদাৰ্থ বিজ্ঞান ত ৯৬, ৰসায়ন বিজ্ঞানত ৯৭ আৰু শাৰীৰিক শিক্ষা বিষয়ত ১০০ নম্বৰ লাভ কৰিছে।

উদ্দীপ্ত চামগুৰি বিলপাৰ নিবাসী বন বিষয়া প্ৰণব কুমাৰ বৰা আৰু পূৰবী বৰাৰ সন্তান। ভৱিষ্যতে এগৰাকী দক্ষ মেকানিকেল অভিযন্তা হোৱাৰ সপোন আগত ৰাখি উদ্দীপ্ত‌ই নিজৰ অধ্যৱসাই চলাই আহিছে।

নগাঁও কেন্দ্ৰীয় বিদ্যালয়ৰ পৰা জিলাৰ ভিতৰতে সৰ্বাধিক নম্বৰ লাভ কৰা ছাত্ৰ জনে বিদ্যালয়ত নিয়মীয়া পাঠ গ্ৰহণ কৰাৰ লগতে নগাঁও চহৰত থকা দাচৱানী শিক্ষা প্ৰতিষ্ঠানত নিয়মীয়াকৈ ক’চিং কৰিছিল।

মেধাৱী ছাত্ৰ উদ্দীপ্ত‌ই দশম শ্ৰেণীৰ পৰীক্ষাত মিছা কেন্দ্ৰীয় বিদ্যালয়ৰ পৰা সুখ্যাতিৰে উত্তীৰ্ণ হৈছিল। এই বৰ্ষৰ এপ্ৰিল মাহত অনুস্থিত জে ই ই মেইনছ পৰীক্ষাতো উদ্দীপ্ত‌ই ৯৫.৯৬ শতাংশ নম্বৰ লাভ কৰি নিজৰ মেধাৰ প্ৰদৰ্শন আগবঢ়াবলৈ সক্ষম হৈছে।

নগাঁও কেন্দ্ৰীয় বিদ্যালয়ত অধ্যয়নৰত ছাত্র উদ্দীপ্ত‌ৰ সফলতাই বিদ্যালয় খনৰ ছাত্র-ছাত্ৰীৰ লগতে শিক্ষাগুৰু সকলকো আনন্দিত কৰি তুলিছে। বৃহস্পতিবাৰে পৰীক্ষাৰ ফলাফল ঘোষণা হোৱাৰ পাছতে উদ্দীপ্তৰ চামগুৰিৰ বাসগৃহত বহু শুভাকাংক্ষী উপস্থিত হৈ শিক্ষাৰ্থীগৰাকীক শুভেচ্ছা জ্ঞাপন কৰে।