তেজপুৰ বিশ্ববিদ্যালয়ে আজি পালন কৰিলে ইয়াৰ প্ৰতিষ্ঠা দিৱস

তেজপুৰ বিশ্ববিদ্যালয়ে ইয়াৰ ২৫ তম প্ৰতিষ্ঠা দিৱস দেওবাৰে পালন কৰে। বিশ্ববিদ্যালয়খনে লগতে  ২১জানুৱাৰিৰ পৰা ২০১৯ চনৰ ২১ জানুৱাৰিলৈকে পালন কৰিবলগীয়া বৰ্ষজোৰা ৰূপালী জয়ন্তী উৎসৱৰ কাৰ্যসূচীও উদ্বোধন কৰে।

তেজপুৰ বিশ্ববিদ্যালয়ৰ উপাচাৰ্য অধ্যাপক মদন মোহন শৰ্মাই অন্যান্য বিশিষ্ট ব্যক্তিৰ উপস্থিতিত বিশ্বিবদ্যালয়ৰ পতাকা উত্তোলন কৰে। আদৰণি ভাষণত তেওঁ বিগত বছৰবোৰত বিশ্ববিদ্যালয়খনৰ লগতে ইয়াৰ ছাত্ৰ-ছাত্ৰীসকলৰ সাফল্যৰ বিষয়ে আলোকপাত কৰে।

তেওঁ কয় যে যদিও বিশ্ববিদ্যালয়খনে বহুতো ভাল ফলাফল দাঙি ধৰিছে, এতিয়াও বিকাশৰ বহু সুযোগ আছে।

ৰূপালী জয়ন্তী উৎসৱ উদ্বোধন কৰি বিশ্ববিদ্যালয়খনৰ প্ৰতিষ্ঠাপক উপাচাৰ্য অধ্যাপক কিশোৰী মোহন পাঠকে বিশ্ববিদ্যালয়খনৰ সৰ্বাংগীন উন্নয়নত অৰিহনা যোগোৱা সকলোলৈ ধন্যবাদ জ্ঞাপন কৰে।

তেওঁ অধ্যাপকসকলক সুউচ্চ শিখৰত আৰোহন কৰাৰ বাবে কঠোৰ সাধনাত ব্ৰতী হ’বলৈ আহ্বান জনায়। তেওঁ শ্ৰেষ্ঠতাৰ উৎকৰ্ষৰ বাবে নিৰন্তৰ সাধনাৰ প্ৰয়োজনীয়তাৰ কথা উল্লেখ কৰে।

ৰূপালী জয়ন্তীৰ অনুষ্ঠানত ভাষণ দি গুৱাহাটী বিশ্বিবদ্যালয়ৰ প্ৰাক্তন উপাচাৰ্য অধ্যাপক অমৰজ্যোতি চৌধুৰীয়ে তেজপুৰ বিশ্ববিদ্যালয়ৰ কাহিনী বৰ্ণনা কৰে। তেওঁৰ ভাষণত বিশ্ববিদ্যালয়খনৰ ২৪ টা গৌৰৱোজ্জল বৰ্ষৰ ইতিহাসৰ প্ৰতিফলন ঘটে।

তেওঁ অধ্যাপক কিশোৰী মোহন পাঠকে প্ৰতিষ্ঠা কৰি যোৱা বিশ্ববিদ্যালয়খনৰ বৰ্তমানৰ কৰ্ম সংস্কৃতিৰ বিকাশৰ ওপৰত গুৰুত্ব আৰোপ কৰি কয় যে অধ্যাপক পাঠকে এখন ডিজিটেল বিশ্ববিদ্যালয়ৰ ধাৰণা গঢ় দিছিল আৰু সেই স্বপ্নৰ বাস্তৱ ৰূপ দিবলৈ অক্লান্ত পৰিশ্ৰম কৰিছিল।

অনুষ্ঠানত অইলৰ মুখ্য পৰিচালন সঞ্চালক উৎপল বৰাই মুখ্য অতিথি হিচাপে উপস্থিত থাকে আৰু ৰূপালী জয়ন্তীৰ কেলেণ্ডাৰ মুকলি কৰে। প্ৰতিষ্ঠা দিৱস উপলক্ষে দিয়া ভাষণত তেওঁ পৰিস্কাৰ আৰু সেউজ তেজপুৰ বিশ্ববিদ্যালয় চৌহদৰ প্ৰশংসা কৰে।

অধ্যাপক চৌধুৰী আৰু বৰাই এই অনুষ্ঠানতে নিজৰ নিজৰ কৰ্মক্ষেত্ৰত দেখুওৱা পাৰদৰ্শিতাৰ বাবে শিক্ষক আৰু ছাত্ৰ-ছাত্ৰীসকলক প্ৰশংসা পত্ৰ বিতৰণ কৰে। তেজপুৰ বিশ্ববিদ্যালয়ৰ যাত্ৰাৰ প্ৰদৰ্শন দাঙি ধৰা ফটো গেলেৰীৰ উদ্বোধনেৰে অনুষ্ঠানৰ সামৰণি পৰে।