দেৱদূতৰূপী চিকিৎসকৰ স্পৰ্শত হাফলঙত চলন্ত ৰে’লতে পৃথিৱীৰ বুকুলৈ এটি কন্যা

জননী সুৰক্ষা ৰাষ্ট্ৰীয় স্বাস্থ্য অভিযানৰ অন্যতম উদ্দেশ্য। কিন্তু স্বাস্থ্য কেন্দ্ৰত চিকিৎসকহীনতাৰ দৰে গুৰুতৰ ব্যৱস্থাগত ত্ৰুটিয়ে শুকুৰবাৰে ৰে’লতে প্ৰসৱ কৰিব লগা পৰিস্থিতিলৈ ঠেলি দিয়ে মাইবাঙৰ এগৰাকী মহিলাক।

মুখ্য মন্ত্ৰীৰ সমষ্টি মাজুলী আৰু কাষৰীয়া অঞ্চলৰ প্ৰসূতিয়ে ৰাস্তাত সন্তান জন্ম দিয়াৰ ঘটনাই ৰাজ্য জোকাৰি যোৱাৰ পিছত এইবাৰ মাইবাঙৰ নমিতা লংমাইলাই নামৰ মহিলাগৰাকীয়ে প্ৰসৱ কৰিছে শিলচৰ-গুৱাহাটী ফাষ্ট পেছেঞ্জাৰ ৰে’লত।

নিজ ঠাইত চিকিৎসক নথকা বাবে অন্তঃসত্বা মহিলাগৰাকীয়ে পতি এছ লংমাইলাইৰ সৈতে হাফলঙলৈ বুলি যাত্ৰা কৰিছিল। তেওঁলোকৰ ঘৰ পাহাৰীয়া ডিমা হাচাওৰ দাওটোহাজাৰ চবুজৈ।

কিন্তু ৰে’লত উঠাৰ পিছতে মহিলাগৰাকীৰ প্ৰসৱ যন্ত্ৰণা আৰম্ভ হয় আৰু তেওঁ এজনী কন্যা সন্তান জন্ম দিয়ে।

সৌভাগ্যক্ৰমে ৰে’লখনত আছিল শিলচৰ মে’দিকেল কলেজ আৰু চিকিৎসালয়ৰ চিকিৎসক-শিক্ষাৰ্থী।

মহিলাগৰাকীৰ প্ৰসৱ যন্ত্ৰণা দেখি চিকিৎসককেইগৰাকী আগবাঢ়ি অহাত ৰে’লতে কোনো হানি-বিঘিনি নঘটাকৈ মহিলাগৰাকীয়ে সন্তানটি জন্ম দিবলৈ সক্ষম হয়।

বৰ্তমান মাতৃ আৰু সন্তান দুয়ো হাফলং অসামৰিক চিকিত্সালয়ত কুশলে আছে। জানিব পৰা মতে ডা০ দীপালি বৰ্মনে তেওঁলোকৰ চিকিত্সা চলাই আছে।

কিন্তু এই পৰিস্থিতিৰ দায়িত্ব ল’ব কোনে, কোন দায়ী?

অভিযোগ অনুসৰি, দাওটোহাজা প্ৰাথমিক স্বাস্থ্য কেন্দ্ৰত কাগজ-কলমত চিকিত্সক, নাৰ্চ সকলো আছে, কিন্তু বাস্তৱত দৰৱ দিয়াৰ কাৰণে ফাৰ্মাচিষ্ট এগৰাকীও নাই!